iklan

NASIONÁL, INTERNASIONÁL, POLÍTIKA

Universidade tolu iha Kamboja atribui titulu Doutoramentu Onoris Kauza ba PR Horta

Universidade tolu iha Kamboja atribui titulu Doutoramentu Onoris Kauza ba PR Horta

Universidade tolu iha Kamboja, atribui titulu doutoramentu onoris kauza ba Prezidente Repúblika, José Ramos Horta, Kinta (20 outubru 2022). Imajen/Mídia PR.

DILI, 22 outubru 2022 (TATOLI)—Universidade tolu iha Kamboja, kinta (20/10) ne’e, atribui titulu doutoramentu onoris kauza ba Prezidente  Repúblika, José Ramos Horta, nu’udar rekuiñesimentu ba kapasidade no kontribuisaun ba komunidade no mundu iha área jestaun konflitu, lideransa no seluk tán.

Universidade tolu refere mak BELTEI International University, Kambodia Universidade no Paragon International University.

Universidade tolu iha Kamboja, atribui titulu doutoramentu onoris kauza ba Prezidente Repúblika, José Ramos Horta, Kinta (20 outubru 2022). Imajen/Mídia PR.

“Sira fo dotoramentu onoris kauza ba ha’u, ne’e hanesan rekuiñesimentu ba ha’u-nia kontribuisaun iha area oioin iha relasaun internsionál, lideransa, jestun konflitu no seluk tan. Dotor onoris kauza ne’e hanesan diploma ida atu rekuiñese ema ruma la’ós estudante universidade ne’e, maibé nia kontribuisaun iha komunidade ka iha nasaun iha mundu hanesan kualifika nia atu simu dotor onoris kauza ne’e,” Xefe Estadu José Ramos Horta hateten liuhosi komunikadu impresa ne’ebé AQgência Tatoli asesu, sábadu ne’e. 

Tuir Prezidente Repúblika, titlu ne’e kontribui mós ba fortalesimentu relasaun entre universidade sira ho personalidade sira iha instituisaun superiór sira iha Kamboja.

“Ne’e kuaze universidade hotu-hotu iha mundu halo ida-ne’e liu-liu atu hametin relasaun entre universidade ho elementu ka personalidade ne’ebe sira fó grau akadémiku ida-ne’e, iha latin bolu “doutór Honoris Causa” iha tradusaun fasil maka doutoramentu onoráriu,” Horta fundamenta.

Iha serimónia ne’ebé partisipa hosi universitáriu rihun ida resin, Prezidente Repúblika foka ba esperiénsia Timor-Leste, Indonézia no Kamboja iha kontestu rekonsiliasaun.

Partisipa iha serimonia atribuisaun dotoramentu onoráriu ba Prezidente Republika, José Ramos Horta, mak Ministru Edukasaun, Juventude no Desportu Kambodia, Hangchuon Naron, membru Governu seluk no mós delegasaun hosi Timor-Leste.

Jornalista : Osória Marques 

Editór      : Cancio Ximenes

iklan
iklan

Leave a Reply

iklan
error: Content is protected !!