DILI, 23 outubru 2022 (TATOLI)—Prezidente Repúblika (PR), José Ramos Horta, ho nia delegasaun, domingu ne’e, fila hikas mai Timor-Leste, hafoin halo vizita Estadu bá Reinu Kamboja iha loron 19 to’o 21 outubru, nu’udar konvidadu Liurai Preah Bat.
Delegasaun to’o iha Aeroportu Internasionál Prezidente Nicolau Lobato, Comoro, iha tuku 12:56, ho aviaun Sriwijaya Air, ne’ebé simu diretamente hosi Primeiru-Ministru, Taur Matan Ruak inklui membru Goveru sira.
“Vizita bá Kamboja la’o di’ak tebes, bele hateten susesu 100% iha relasaun bilaterál ho Liurai boot Majestade Preah Bat, Governu tomak inklui populasaun sira hatudu solidaridade maka’as ba Timor-Leste,” PR Horta hateten iha Aeroporu Comoro.
Notísia relevante: Kambodia apoia Timor-Leste sai membru ASEAN iha 2023
Xefe Governu haktuir, Reinu Kamboja hakarak dezenvolve relasaun ekonómiku, komersiál, no investimentu iha área agrikultura no turizmu. Vizita ne’e ko’alia mós buat barak ho membru Prezidente Senadu tanba sira iha Senadu ida hanesan Prezidente Kámara ne’ebé reprezenta Asembleia Lejislativa.
Iha vizita Estadu ne’e, halo mós fórum ba setór privadu ne’ebé Timor-Leste liuhosi Ministériu Negósiu Estranjeiru no Kooperasaun (MNEK) no TradeInvest organiza ho susesu boot, ne’ebé hetan partisipante 200, durante oras lubuk ida.
Aleinde ne’e, Xefe Estadu ko’alia iha universidade tolu iha loron-ida nia laran, ne’ebé hetan partisipasaun másimu hosi akadémiku sira tanba kada eskola ho partisipante 1.000.
“Ida-ne’e hatudu relasaun ho Timor-Leste ho Kambódia metin loos no kontinua ita-nia prosesu esforsu atu tama ba Asosiasaun Nasaun Sudeste Aziátiku (ASEAN, sigla portugés), ne’ebé Xefe Estadu ASEAN nian sei halo reuniaun semana dahuluk iha fulan-novembru hodi foti desizaun, Timor-Leste atu tama membru ASEAN,” Horta akresenta.
Tuir Xefe Estadu, desizaun Timor-Leste atu tama ba membru ASEAN iha ona konsensu maibé país membru sira mak sei deside kalendáriu bainhira loos mak tama.
“Sei fó sai iha fulan-novembru tinan ne’e. Ita ko’alia dala barak ona preferénsia Timor-Leste nian atu tama iha tinan 2023, iha tempu Prezidénsia Indonézia nian, maibé klaru desizaun ne’e pertense ba Xefe Estadu iha reuniaun sira ne’ebé simeira sira halo iha fulan-novembru mai,” nia tenik.
Jornalista : Arminda Fonseca
Edtora : Julia Chatarina
