BOBONARU, 24 outubru 2022 (TATOLI)-Koordenadór Eletrisidade Timor-Leste, Empreza Públika (RDTL, E.P) munisípiu Bobonaru, Mário de Jesus, hateten durante ne’e eletrisidade mate no lakan iha postu administrativu Bobonaru, kauza hosi natureza tanba agora tama ona tempu udan ne’ebé akompaña ho anin-boot.
Notísia relevante: EDTL Bobonaro esforsu fornsese eletrisidade ba komunidade Balibo-Atabae
Nia dehan, udan-boot dalaruma akontese rai-halai, estraga poste eletrisidade balun, no anin-boot bele rezulta kabu-media tensaun haksoit sai, nune’e ahi tenke mate, no tékniku sira uza sistema manuál mak detekta fatin ne’ebé avaria.
“Entaun ahi mate ha’u nia ema sira tenke koloka sira nia-an ba fatin-fatin ou ita tenke la’o hosi ai-rin ida ba ida hatun ida ne’e hatun ida ne’ebá halo remata hotu mak normaliza ahi, hatama ida-ida mak kuandu ahi ne’e mate, ezemplu bairru (A) entaun nia moras ne’e iha ne’ebá, restante ita bele hatama fila-fali kontinua lakan, maibé presiza tempu”, Mário dehan ba TATOLI iha ninia servisu fatin, ohin.
Mário esklarese bainhira kauza hosi avaria ne’e ladún todan, tékniku sira bele normaliza lalais, maibé kuandu grave hanesan poste tolu ka haat mak monu dala ida, presiza tempu loron tolu sira hanesan ne’e mak foin ahi bele lakan.
Tanba ne’e, nia husu ba konsumidór sira, bainhira akontese eletrisidade mate lakan tenke desliga sasán eletróniku sira. “Ne’e para ahi ne’e lakan karik labele tiru liu mai ita nia sasan sira, hosi ahi ne’e lakan to’o minutu 15 mak foin bele hamoris fali, kuandu lakan-lakan ita labele uza lai, ne’e para tékniku sira normaliza didiak mak foin bele uza”.
Nia apela ba kliente hotu, bainhira mosu avaria ruma labele koko mesak atu rezolve, maibé tenke hato’o informasaun ba tékniku sira ne’ebé destakadu iha postu sira para halo intervensaun direta hodi labele akontese inséndiu no impaktu ba ema-nia vida.
Tuir dadus estatístika autoridade munisípiu Bobonaru 2022, postu Bobonaru iha aldeia 63 suku 18 ho totál 32,581, kompostu hosi mane nain 17,939 feto 14,661 ho nia totál xefe família 6.936.
Jornalista : Sérgio da Cruz
Editora : Rita Almeida
