Estudante hamutuk 5.949 tuir ezame nasionál iha Baucau
BAUCAU, 24 outubru 2022 (TATOLI) – Estudante baziku sentrál no sekundáriu jerál inklui tékniku vokasionál hamutuk nain-5.949 tuir ezame nasionál iha munisípiu Baucau.
Ezame nasionál ba loron dahuluk iha sentru realizadór hamutuk 50, iha nivél ensinu báziku hamutuk 30 no ensinu sekundária ho totál 16 inklui tékniku vokasionál haat, ne’ebé lokaliza iha postu admistrativu neen iha munisípiu Baucau.
“Hosi 50 sentru realizadóra ezame nasionál ohin la´o ho di´ak mezmu iha difikuldade oituan”, Diretór Servisu Munisipál Edukasaun Baucau, Augusto Ornai Ximenes, hateten iha vila nova, segunda ne’e.
Difikuldade mak hanesan hosi total partisipante sira edukasaun Baucau rejista iha estudante balun mak la tuir ezame nasionál tanba kondisaun moras no gravida maske seidauk halo rekapitulasaun no konsideradu auzente nune’e tuir planu sei autoriza tuir ezame segunda via iha loron 7 novembru 2022.
Fallansu seluk mak iha aspetu tékniku hanesan pontu ezame balun iha resposta hanesan inklui folla resposta ne’ebé tinta iha durante prosesu imprime.
Maske nune’e, parte edukasaun Baucau konsege resolve imediata hodi troka ho folla rezerva ne’ebé prepara ona.
“Fallansu sira-ne’e la grave liu, ita rejista atu relata ba gabinete evaluasaun no dezenvolvimentu kurikulár ministéiru edukasaun juventude no desportu (MEJD)”, Augosto Ornai akresenta.
Ezame nasionál iha eskola ensinu Sekundária númeru 1 Baucau tenke aloka estudante sira ba fatin tolu hanesan iha ESJ 1 Baucau rasik, EBF vila nova no EBF triloka tanba menus sala aula ne’ebé utiliza hosi estudante hamutuk nain-639.
Nune’e mos, Ensinu Báziku Sentrál (EBC, sigla Portugés) Ossuhuna, postu Baguia tenke ezame iha ESG, Taur Matan Ruak, tanba iha faze reabilitasaun sala aula.
Ezame loron dahuluk hahú ho matéria Matemátika no Inglés no tuir planu sei finaliza iha loron kuarta 26 outubru no kontinua ho ezame lokal iha loron kinta 27 too loron 29 outubru.
Totál dadus jerál ne’ebé rekolla iha mós klasifikasaun ba dadus hosi ensinu báziku terseiru síklu, nonu ano iha estudante finalista 3.355 kompostu hosi mane 1.615 no feto 1.640, ESG iha 2.345 kompostu hosi mane 1.058 no feto 1.287, no Tékniku vokasionál iha nain-249 kompostu hosi mane 137 no feto 112.
Jornalista : Natalino Belo
Editór : Zezito Silva
