Top

Kazu Komandu PNTL notifika Independente, AJTL sei haruka karta ba Xefe Estadu

Prezidente Asosiasaun Jornalista Timor Lorosa’e (AJTL), Zevonia Viera, hamutuk ho estrutura hala’o konferénsia imprensa. Imajen Tatoli/Osória Marques.

DILI, 24 outubru 2022 (TATOLI)–Prezidente Asosiasaun Jornalista Timor Lorosa’e (AJTL), Zevonia Viera, hateten liga ho kazu Komandu Jerál Polísia Nasionál Timor Leste (PNTL) haruka karta notifikasaun bá Xefe Redasaun no jornalista hosi  Jornal Diáriu (JN) Independente ne’e. AJTL sei haruka karta ba Xefe Estadu ho Xefe Governu.

“AJTL sei haruka karta ba Prezidente Républika, José Ramos Horta nu’udar mós Laureadu Premiu Nobel da Paz no Primeru Ministru Taur Matan Ruak, kona-ba Komandu PNTL nia karta  notifkasaun tanba ameasa daudauk liberdade imprensa no liberdade espresaun iha ámbitu Timor-Leste halo preparasaun atu tama iha ASEAN iha tinan oin,” Zevonia Vieira hateten ba jornalista sira liuhosi konferénsia imprensa, iha sede AJTL, Fatuhada, Dili, segunda ne’e.

Tanba, nia dehan, karta notifikasaun ne’e hakanek ona liberdade imprensa no valór demokrasia iha Timor-Leste bainhira prepara an atu tama iha ASEAN.

Ho nune’e, AJTL kontra no kondena notifikasaun hosi Komandu Jerál PNTL ne’ebé dirije ba Xefe Redasaun Jorál Independente, Jorginho dos Santos no Jornalista Domingos Gomes tanba sei hatauk jornalista no mídia atu halo auto sensura iha kontestu kobertura o publikasaun notísia sira iha futuru.

AJTL konsidera karta notifikasaun ida-ne’e hatudu katak Komandu Jerál PNTL la a-favór ba lia-loos kona-ba intervensaun polítika ba instituisaun seluk nia servisu ne’ebé kanál mídia sira públika, maibé hakruuk liu presaun polítika hosi governante no politiku sira.

Tanba ne’e, AJTL husu Komandu Jerál PNTL atu hapara notifikasaun ne’ebé haruka ba Redasaun Jornál Independente no husu atu uza lei Komunikasaun Sosiál atu rezolve kazu sira-ne’ebé iha ligasaun ho produtu jornalístiku, la’ós uza fali kódigu penál hodi kondena jornalista no mídia tanba notísia la’ós aktu krime.

AJTL husu ba Conselho de Imprensa atu foti inisiativa hodi halo mediasaun ba kazu kriminaliza ba produtu jornalístiku ka kazu entre PNTL no Independente ne’ebé nia kauza mak publikasaun notísia atu rezulta ba iha win-win solution.

AJTL husu ba jornalista sira no kanál mídia hotu-hotu iha rai-laran atu fó salidariedade ba malu hodi kontinua publika kazu ne’e to’o hetan solusaun loloos no justu.

Jornalista no mídia hotu-hotu atu nafatin kumpre Kódigu Étika Jornaístika, Lei Komunikasaun Sosiál no prinsípiu sira jornalizmu nian bainhira hala’o kna’ar jornalizmu iha ne’ebé de’it, atu nafatin asegura no garante liberdade imprensa no liberdade espresaun iha Timor-Leste.

Jornalista : Osoria Marques

Editór       : Cancio Ximenes

Publisidade

Leave a Reply

Latest Post

error: Content is protected !!