EDUKASAUN, HEADLINE

MEJD enkoraja estudante esforsu-an hetan rezultadu di’ak iha ezame nasionál

MEJD enkoraja estudante esforsu-an hetan rezultadu di’ak iha ezame nasionál

Ministru Edukasaun Juventude no Desportu (MEJD), Armindo Maia, akompaña estudante EBC Akanunu Hera halo ezame, segunda (24/10). Imajen Tatoli/Tomé Amado

DILI, 24 outubru 2022 (TATOLI)–Ministru Edukasaun Juventude no Desportu (MEJD), Armindo Maia, enkoraja estudante iha territóriu nasionál ne’ebé ohin loron partisipa iha ezame nasionál atu esforsu-an nafatin hodi hetan rezultadu di’ak.

“Ba ita-nia estudante sira ne’ebé maka durante ne’e kuda buat barak konserteza bele ku’u rezultadu barak no di’ak, maibé ba sira ne’ebé durante ne’e la esforsu, atu kuda buat barak halo nafatin esforsu sira liuhosi orasaun atubele hetan ajuda ruma hodi bele ultrapasa ezame nasionál ne’e ho di’ak no susesu,” Ministru Armindo Maia hato’o kestaun ne’e bainhira halo abertura ezame nasionál iha Eskola Ensinu Báziku Sentrál (EBC, sigla portugés), Akanunu Hera, segunda ne’e.

Governante ne’e konsidera, ezame nasionál hanesan kestaun sériu tanba atu haree preparasaun kada estudante durante tinan-tolu nia laran.

“Ezame nasionál nu’udar sasukat ida atu sukat kapasidade estudante ida-idak. Matéria sira ne’ebé durante ne’e estudante sira hetan iha prosesu ensinu aprendizajen nia laran bele aplika iha ezame nasionál no buat sira ne’ebé sira kuda durante tinan-tolu bele ku’u ninia rezultadu iha tinan ne’e,” nia akresenta.

Notísia relevante: Estudante 58.132 iha territóriu nasionál sei tuir ezame nasionál

Aleinde ne’e, Ministru husu ba ezaminadór no supervizór sira hotu iha territóriu nasionál atu hala’o ida-idak ninia servisu ho responsabilidade tomak tanba ezame nasionál kestaun sensitivu tebes.

“Husu ba hotu-hotu servisu di’ak no susesu ba hotu-hotu,” nia enkoraja.

Iha biban hanesan, Diretór Eskola EBC Hera, Sancho Menezes, hateten, estrutura eskola apresia no agradese ba MEJD tanba bele deside eskola ne’e hodi realiza serimónia abertura ezame nasionál iha territóriu nasionál.

“Ne’e hanesan onra ida ba eskola. Totál estudante finalista ensinu báziku terseiru siklu EBC Hera ne’ebé sira submete ona ba edukasaun munisípiu hamutuk 223 kompostu hosi feto 122 no mane 111, maibé estudante na’in-neen maka auzente, entaun hela de’it estudante 217 maka tuir ezame nasionál,” nia informa.

Estudante neen ne’e desde ezame períodu daruak kedan la partisipa tanba muda ona sira-nia hela fatin maibé tanba dadus tama ona iha edukasaun nasionál maka eskola konsidera nafatin.

Estudante finalista hamutuk 58.132 iha territóriu nasionál mak partisipa iha ezame nasionál, kompostu hosi ensinu báziku terseiru siklu 30.836, ensinu sekundáriu jerál no privadu 22.525, ensinu sekundáriu tékniku vokasionál 43.039 no ensinu rekorrente 382.

Ezame nasionál hahú loron 24 to’o 26 outubru 2022 no ezame lokál sei hahú iha loron 27 to’o 29 outubru 2022, ne’ebé matéria pontu ezame nasionál prepara hosi ministériu, liuhosi responsável Unidade Kurríkulu Nasionál no ezame lokál prepara hosi eskola ida-idak.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!