OÉ-CUSSE, 24 outubru 2022 (TATOLI) – Ministru Petróliu no Minerais (MPM), Víctor da Conçeição Soares, hamutuk ho Prezidente Autoridade Nasionál Petróleu Minerais (ANPM), Florentino Mateus Soares Ferreira, segunda ne’e realiza audénsia konsulta kona-bá Lei Kódigu Mineiru ba Autoridade Rejiaun Administrativa Espesiál Oé-Cusse Ambeno (RAEOA), atu iha futuru bele dezenvolve asuntu metaliku no non-metaliku iha rejiaun refere.
Hafoin remata konsultasaun, Ministru Petróliu Minerais, Víctor da Conçeição Soares, informa katak, Timor-Leste iha ona enkuadramentu legál ne’ebé tama ona ba vigór hodi jere esplorasaun rekursu Minerais iha territóriu rai laran tuir kódigu mineiru ne’ebé prevista iha Lei nú. 12/2021, 30 juñu,
Tanba nia dehan, enkuadramentu legal refere ne’e maka Lei nú. 12/2021, 30 juñu, sei sai matadalan ba jestaun esplorasaun rekursu minerais, hahú hosi atividade rekoñesimentu, prospesaun, peskiza, dezenvolvimentu, produsaun, prosesamentu no merkadória to’o atividade desmantelamentu.
Ministru ne’e isplika, prinsipíu hosi MPM sei asegura atividade Minerais-sira iha Timor-Leste, no tenki ezekuta tuir rekezitu-sira ne’ebé prevee ona iha enkuadramentu legál ne’e. Tanba bazea artigu 1.3 iha Lei nú. 12/2021, 30 juñu, kona-bá Kodigu Mineiru, kompeténsia hodi administra atividade Minerais iha RAEOA.
“Tan ne’e maka ohin ami mai atu ko’alia ajenda roteru sosializasaun bá ezekusaun Kódigu Mineiru ne’ebé antes ne’e Parlamentu Nasionál aprova ona. Depois asuntu ne’e ami sosializa ona ba iha minisipiu sira-hotu. Ohin ha’u mai akompaña ANPM atu ko’alia asuntu estratéjiku balun relasaun ho dezenvolvimentu setór Mineiru nian, ne’ebé atu dezenvolve industria Mineira,” Ministru Petrólio Minerais, Víctor da Conçeição Soares, informa ba jornalista sira iha Gabinete ZEESM Oé-Cusse.
Tuir Governante ne’e katak, petróleu no gás daudaun ne’e dezenvolvidu kuaze tinan 20 ona, no Timor-Leste moris ho reseita petróleu nian, maibé atu diversifika reseita hodi tama ba industria Mineiru, maka VIII Governu mós persiza haree rikusoin sira-ne’ebé relasaun ho Minerais metaliku sira hanesan, besi ho buat sira-ne’ebé relasaun ho metal, no mós non-metaliku hanesan fatuk, rai-henek, marmer, kalkariu no metal persiozas osan mean no osan mutin.
“Industria ida-ne’e to’o agora seidauk bo’ok, tanba atu tama iha setór ida-ne’e, tenki mai sosializa para iha futuru bele halo MoU ho Autoridade RAEOA, nune’e bele dezenvolve hamutuk antes kompeténsia sira-ne’e entrega ba RAEOA. Ha’u mai atu ko’alia tama ba faze téknika depois buka mekanizmu ba futuru bele entrega kompeténsia sentrál nian mai RAEOA,” nia afirma.
Nune’e mos Prezidente Autoridade RAEOA, Arsénio Paixão Bano, agradese ba prezensa Governu Sentrál, liuhosi Ministériu Petróleu Minerais no ANPM mai sosializa Lei-Mineiru nian ba Autoridade RAEOA.
“Ita hatene tanba daudaun ne’e Oé-Cusse mós estabelese ona kooperasaun ho Timor-Gap, idea ne’e Ministériu Petróleu maka inisiátiva. Ho nune’e oportunidade ne’e itabele deskuti liu hosi MoU ida para haree mós setór sira seluk, kona-bá metalika no non metalika. Ha’u mos sujere atu hahú haree fatuk ho rai-henek atu komesa komersializa atu hatan ba reseita kofre estadu nune’e bele halo tán investimentu ba área seluk tán,” nia dehan.
Jornalista: Abílio Elo Nini
Editóra: Armandina Moniz
