DILI, 24 outubru 2022 (TATOLI)—Ministériu Saúde (MS) ho Organizasaun Mundiál Saúde (OMS), segunda ne’e, halo abertura treinamentu ba profisionál saúde sira hosi ospitál referál sira atu hasa’e kapasidade kona-ba fó atendimentu kuidadu emerjénsia ba moras kritiku sira.
“Formasaun ne’e ba profisionál saúde sira ho durasaun to’o semana neen, atu hasa’e sira nia kapasidade hodi ba fila-fali sia nia ospitál hodi halo atendimentu ba pasiente moras krítiku sira hodi redus halo transferénsia mai Nasionál”, hateten Vise Ministru Saúde, Bonifacio Maucoli Dos Reis iha Dili.
Atividade treinamentu ne’e suporta másimu husi OMS no Diresaun Nasionál Hospitalar ba ho objetivu atu hasa’e abilidade médiku no Enfermeiru sira atubele fó tratamentu médiku ba pasiente kritiku sira no bele salva pasiente sira nia moris.
Iha biban hanesan, Reprezentante Organizasaun Mundiál Saúde, Arvind Mathur, informa estabelesimentu servisu kuidadu krítiku sira, iha ospitál ida-ne’ebé ho medida apropriadu oferese vantajen potensiál sira, husi hadi’a kuidadu ba pasiente sira, formasaun, manutensaun, ba espesialidade no abilidade Enfermeiru no uzu rekursu sira ho efisiente.
“Rezultadu pasiente sira-ne’e bele hadi’a, liuhusi aumentu iha prestasaun kuidadu krítiku, ne’ebé halo padraun ba prestasaun kuidadu saúde nian, fornese pesoál espesialista sira, no hadi’a monitorizasaun ba pasiente sira, no fasilita modalidade tratamentu balun ba apoiu órgaun nian”, katak.
Molok tinan 2019, Timor-Leste iha de’it kapasidade unidade kuidadu intensivu ida-ne’ebé eziste, no disponivel de’it iha HNGV ho kama 5 to’o 6 de’it. Nune’e ho moras COVID-19 ne’ebé habelar lalais, ida-ne’e kria nesesidade boot ba ospitál no atendimentu kuidadu kritiku sira atu disponivel no prontu atu jere pasiente sira ne’ebé moras krítiku liu-liu relasiona ho COVID-19.
“Tanba ne’e, ami kontente atu nota katak tuir rekomendasaun no konsellu husi OMS, Governu Timor-Leste liuhusi Ministériu Saúde ho apoiu husi parseiru barak, halo ona esforsu hodi estabelese unidade foun ba kuidadu intensivu ba COVID-19 iha Ospitál Lahane ho kuaze kama 25 no sentru izolasaun Vera-Cruz ho kuaze kama 45”.
Nu’udar parte ida husi resposta ba COVID-19, Governu mós estabelese “Unidade Dependensia Aas” ida iha ospitál referál lima seluk inklui Ospital Rejionál Baucau HoREX atu jere pasiente sira ne’ebé moras todan no moderadu. Kuaze sentru hirak-ne’e hotu inaugura ona husi Ministériu Saúde iha fulan hirak ikus ne’e.
Alende, profisionál saúde husi Ospitál Referál no Rejionál hosi munisípiu ne’ebé tuir treinamentu kona-ba atendimentu emerjénsia krítiku iha Hopsitál Nasionál Guido Valadares (HNGV) hamutuk 90.
Jornalista : Felicidade Ximenes
Editór : Florencio Miranda Ximenes
