OÉ-CUSSE, 24 outubru 2022 (TATOLI) – Primeiru Ministru, Taur Matan Ruak sei prezide serimonia isar bendeira iha loron Proklamasaun Independesia ba dala-47 iha Rejiaun Administrativa Espesiál Oé-Cusse Ambeno (RAEOA).
Liafuan ne’e dehan hosi Prezidenti Rejiaun Administrativa Espesiál Oé-Cusse Ambeno (RAEOA), Arsénio Paixão Bano ba jornalista sira hafoin remata enkontru iha salaun administrasaun Oé-Cusse.
Autoridade RAEOA ne’e isplika, enkontru ne’e halao ba preparasaun ikus nian, kona-bá komemorasaun loron Proklamasaun Unilaterál 28 novembru iha Oé-Cusse, tanba iha komemorasaun tinan ne’e, sei prezide hosi Primeiru Ministru, Taur Mata Ruak.
“Ohin ita mai atu reforsa de’it komisaun sira-ne’ebé iha ona, tanba komemorasaun 28 novembru tinan ne’e iha diferente oituan ho tinan sira seluk. Tanba, komemorasaun tinan ne’e sei partisipa husi Primeiru Ministru, Taur Matan Ruak,” Autoridade RAEOA Arsenio hateten.
Nia mos dehan tan, tuir planu Primeiru Ministru, Taur sei to iha RAEOA iha loron 26 novembru atu dirije loron istóriku ne’e.
Nia fó sai katak, iha enkontru ne’e nia sujere ba komisaun organizadóra- atu envolve veteranu Oé-Cusse ninian, primeiru prioridade ba ema na’in-300 hodi simu medalha rekoñesimentu hosi Estadu Timor-Leste.
“Ita sujere no husu antes loron sanolu iha fulan novembru ne’e, bendeira RDTL tenki harii iha uma oin, no husu ema hotu partisipasaun iha loron 28 novembru. No mos husu funsionáriu hotu atu harii bendera iha uma oin, tanba ne’e loron reflesaun ba ita-nia povo Timor-Leste tomak,” nia fó hanoin.
Purtantu kona-bá orsamentu ba komemorasaun ba loron proklamasaun 28 novembru ne’e, daudaun ne’e sei deskuti. Tanba, orsamentu sei la bo’ot, no sei husu partisipasaun kontribuisaun hosi setór privadu liu-liu emprezáru sira iha Oé-Cusse.
Nia mos hateten tan katak, komemora loron bo’ot ne’e, sei iha atividade komunitáriu liu-liu jogu komunitáriu no seluk tan inklui programa karavana kulturál. Ho ida ne’e, kontribuisaun hosi setór privadu importante atu apoiu programa sira-ne’e, hodi hamenus despeza ba 28 novembru nian.
“Proposta ba orsamentu ne’e mai hosi komisaun organizadóra besik rihun $80, maibé ha’u husu atu redus tanba ita hakarak envolve suku 18 no sub-rejiaun haat iha territóriu RAEOA. Iha komemorasaun ne’e sei involve, organizasaun masa no arte marsiál, ONG, populasaun, estudane sira, no envolve mós veteranu hotu no grupu feto sira-ne’ebé durante ne’e RAEOA apoia , nune’e mós sei realiza feira popular durante loron sanolu,” Arsenio dehan.
Jornalista : Abílio Elo Nini
Editóra : Armandina Moniz
