PNDS Baucau sei konklui distribuisaun materiál iha novembru
BAUCAU, 24 outubru 2022 (TATOLI) – Programa Nasionál Dezenvolvementu Suku (PNDS) munisípiu Baucau, tuir planu sei konklui distribusaun kalen liuhosi atividade Uma Kbi’it La’ek + B iha fulan-novembru.
UKL plus B iha munisípiu Baucau implementa iha postu Baucau vila B ne’ebé finaliza ona kona-ba rekollimentu dadus iha suku sanulu no hela suku Seisal hosi totál hamutuk 11 ne’ebé kada suku sei iha benefisiáriu hamutuk uma-kain 37 hosi tótal 407 xefe família.
“Prioridade ba benefisiáriu sira atu utiliza kalen ho di´ak mak labele faan fali tanba PNDS liuhosi ekipa fiskalizasaun hamutuk ho autoridade suku sei tun ba terenu atu monitoriza tuir”, Diretora Programa Nasionál Dezenvolvementu Suku (PNDS) Munisipál Baucau, Amélia Maria Viegas, hateten ba Agénsia Tatoli iha vila nova, segunda ne’e.
UKL+B implementa bazea ba dekretu-lei númeru 25/2022, loron-19 maiu kona-ba UKL plus ho objetivu kontribui ba hamenus kiak iha Timor-Leste, garante moris di´ak, uma ne’ebé seguru no garante ema hotu iha oportunidade atu horik iha uma ne’ebé dignu.
Rekezitu importante mak tuir kondisaun hanesan uma fatuk, meia parede, kategória sosiál mak komunidade ne’ebé iha uma premanente ka semi-permanente no estatutu rai tenke privadu ne’ebé iha dokumentu legál hosi Ministéiru Justisa (MJ) no selesiona hosi autoridade suku inklui rekuñesementu hosi admistradór postu.
Totál orsamentu UKL+ B iha postu Baucau vila hamutuk milaun $ 12 no kustu operasionál ba kada suku hamutuk atus $9 resin.
Jornalista : Natalino Belo
Editór : Zezito Silva
