Prevene COVID-19, USAID-UNICEF entrega ekipamentu médiku ba MS
DILI, 24 outubru 2022 (TATOLI)—Estadu Unidu Amérika (EUA), liuhusi nia-Ajénsia ba Dezenvolvimentu Internasionál (USAID) ho Fundu Nasaun Unida ba Labarik (UNICEF), segunda ne’e, entrega ekipamentu médiku ba Ministériu Saúde hodi apoia no responde ba situasaun COVID-19 no prosesu sistema rekuperasaun saúde.
“Ita entrega sasan saúde nian ba Ministériu Saúde hodi responde ba situasaun COVID-19 no prosesu sistema rekuperasaun saúde ba tempu naruk”, hatete Enkaregadu Negósiu Embaixada Estadu Unidu Amérika, Tom Daley, iha edífisiu SAMES, Kampu-Alór-Dili.
Ekipamentu ne’e, MS sei ajuda sentru saúde komunitaria sira iha munisípiu lima hanesan Dili, Baucau, Ermera, Manatuto no Covalima atu hadi’a kualidade bee, saneamentu no ijiéne hodi halo kontrolu ba infesaun.
“Kontribuisaun ida ne’e, Marka ami nia istória no komprimisiu ba timoroan ho objetivu mellora servisu saúde ba povu Timor-Leste”.
Materiál médiku hirak ne’e inklui mós konsetradór ba oksijéniu hamutuk 50 no ekipamentu protesaun pesoál (PPE) adekudu hodi responde ba servisu saúde sira.
Iha fatin hanesan, Adjuntu Reprezentante UNICEF iha Timor-Leste, Ainhoa Jaureguibeitia, reforsa ekipamentu médiku liuliu oksijéniu atu salva ema nia moris, bainhira hetan moras ruma ne’ebé relasiona ho sistema respiratóriu inklui halo tratamentu ba pasiente COVID-19 ka pneumonia.
“Ohin loron, ami kosentra tan oksijéniu hamutuk 50 ba Ministériu saúde hodi halo distribuisaun ba ospitál sira iha territóriu nasionál,” katak Ainhoa Jaureguibeitia.
Prevensaun no kontrolu infensaun hanesan save atu asegura profisionál saúde no pasiente iha fasilidade saúde hodi seguru nafatin husi moras no hapara transmisaun moras inklui proteje sira.
Entretantu, Ministra Saúde Odete Maria Freitas Belo, agradese apoia hosi EUA liuhosi nia ajénsia sira hanesan USAID no UNICEF hodi mellora servisu atendimentu ba pasiente sira.
Ekipementu médiku no materiál hirak ne’e fundu hosi USAID hamutuk milliaun $42,4 ba UNICEF hodi hadi’ak servisu saúde nian iha ospitál no sentru izolamentu sira, aumenta kobertura ba servisu esensiál saúde inan no bebé, hadi’a asesu informasaun kona-ba vasinasaun no prevensaun COVID-19.
Jornalista : Felicidade Ximenes
Editór : Florencio Miranda Ximenes
