COVALIMA, 24 outubru 2022 (TATOLI)–Sekretáriu Administrasaun Munisípiu Covalima, Francisco de Jesus Alves, informa projetu Programa Mão de Obra Postu Administativu (PMOPA) faze daruak iha Covalima ne’e, postu administrativu Fatumea, Tilomar no Fohorem finaliza ona.
“Implementasun PMOPA faze daruak tuir matadalan kada grupu implementa durante loron-20 maibé dala ruma iha postu balun ho de’it ezijénsia komunidade barak liu. ita rekruta kada grupu ema na’in -20. Entaun ita fahe tempu hodi halo rotasaun ba ita-nia komunidade hakarak servisu iha PMOPA entaun rekruta to’o ema-na’in kuaze 40, ne’ebé iha postu administrative Fatumea, Fohorem no Tilomar finaliza ona implementa PMOPA faze daruak,” Francisco de Jesus Alves hateten ba Agencia Tatoli, iha AMC ,Sukaer-Laran, segunda ne’e.
Implementasaun PMOPA faze daruak, iha postu administrativu balun implementa de’it durante loron 12 tanba sira aumenta traballadór kada grupu to’o ema-na’in-40, nune’e populasaun sira sente partisipa hotu iha PMOPA.
Implementasaun PMOPA iha postu administrativu sira-ne’e prióridade ba halo manutensaun no hamoos esgotu, halo manutensaun ba estrada, hamooslixu, iha fatin públiku, tanba matadalan PMOPA ko’alia klaru katak labele halo konstrusaun foun.
Bazea ba matadalan, implementasaun Programa Mão de Obra Postu Administrativu (PMOPA) katak faze dahuluk sira uza orsamentu 50% ekivalente ba osan $50.000-resin, ne’ebé kada postu administrativu ida aloka orsamentu rihun $100-resin, ho nune’e totál orsamentu implementasaun PMOPA iha postu administrativu hitu (7) ne’e hamutuk $782.000.
Jornalista : Celestina Teles
Editór : Cancio Ximenes
