Reabilitasaun Sede Suku iha Baucau atinje pursentu 90
BAUCAU, 24 outubru 2022 (TATOLI) – Reabilitasaun Sede Suku (RSS) iha munisípiu Baucau atinje ona pursentu 90. Projetu ne´e utiliza orsamentu 2021 liuhosi Programa Nasionál Dezenvolvimentu Suku (PNDS).
Sede suku hamutuk 34 mak reabilita ona iha munisípiu Baucau ba faze dahuluk nian no iha postu administrativu tolu kompostu hosi Laga hamutuk hitu, Quelicai 14 no suku sanolu iha postu Baucau-vila.
“Hein atu finaliza de´it ona, ita komprende de´it ona tanba volume serbisu ne’ebé barak entaun fó impaktu ba implementasaun”, Diretóra Programa Nasionál Dezenvolvementu Suku (PNDS) Munisipál Baucau, Amélia Maria Viegas, hateten ba Agénsia Tatoli iha vila nova, segunda ne’e.
Hosi 34 suku, hela suku tolu mak seidauk reabilita, hanesan suku Seisal no Tirilolo hosi postu Baucau-vila tanba presija koordenasaun ho autoridade suku inklui postu Qelicai iha suku Maluru tanba mosu protesta hosi autoridade suku relasiona ho montante orsamentu.
Programa refere kontinua ba faze datoluk iha tinan-2022 ne’ebé PNDS implementa iha postu tolu seluk hanesan Venilale hamutuk suku hitu, Baguia suku sia no hitu seluk hosi postu Vemase.
Enkuantu hosi suku tolu refere suku tolu mak mak konstrui liuhosi orsamentu PDIM hanesan suku Uailaha hosi postu Venilale, Samalari hosi postu Baguia no Vemasi iha suku Uaigae.
“Fila ba estratejia xefe suku sira atu oinsa bele utiliza osan ho didiak tanba prioridade tuir kondisaun sede suku”, Amélia Viegas akresenta.
Munisípiu Baucau hamutuk suku 59 no suku 53 mak hetan alokasaun orsamentu hosi PNDS ba programa RSS ne’ebé kada suku aloka entre rihun $10 to’o $12 hosi tótal orsamentu faze-dahuluk no daruak hamutuk $264.173,50 no faze-datoluk hamutuk $137.970,00.
Jornalista : Natalino Belo
Editór : Zezito Silva
