WFP promete kontinua apoia TL iha área nutrisaun no seguransa alimentár
DILI, 24 outubru 2022 (TATOLI)- Reprezentatante World Food Programme (WFP) Country Director, Alba Cecilia Garzon Olivares, segunda ne’e, halo enkontru ho Primeiru Ministru, Taur Matan Ruak, hodi hato’o kompromisu atu kontinua hametin kooperasaun ho Governu Timor-Leste iha área nutrisaun no seguransa alimentár.
“Ami prontu apoia Timor-Leste iha área nutrisaun no seguransa alimentár ninian no ohin ho Primeiru Ministru ko’alia hela kona-ba orsamentu no ha’u hanoin katak sesaun funsaun prioridade sira ne’ebé karik sei serve di’ak liu nasaun ne’e no seluk atu finaliza no suporta ka hadi’a nutrisaun no seguransa alimentár, ami iha ne’e atu suporta,” hatete Alba iha Pálasiu Governu, segunda ne’e..
WFP sei hahú programa iha janeiru 2023 nu’udar liña foun ba ajenda Governamentál foun ho baze orsamentu foun no sente kontente atu suporta Governu Timor-Leste ho kapasidade tékniku sira, programa ne’e sei hala’o durante tinan tolu hahú 2023 to’o 2025.
Programa WFP nian foka liu ba alimentasaun no nutrisaun atu kombate manutrisaun iha Timor-Leste no kona-ba orsamentu atu implementa programa sira ne’e seidauk hatene loos montante hira programa hirak ne’e sei hala’o iha territóriu nasionál.
Antes ne’e, WFP apoiu ona ai-han ba inan isin rua iha munisípiu neen hanesan, Baucau, Covalima, Ermera, Dili, Manatuto no Manufahi.
Apoiu hirak ne’e hanesan, ai-han pakote foos tonelada 1.594, koto tonelada 213 no mina ho tonelada 106 ba fulan tolu nian no distribui hotu ona ba Munisipiu neen.
Jornalista: Hortencio Sanchez
Editór : Florencio Miranda Ximenes
