DILI, 25 outubru 2022 (TATOLI)—Xefe suku Caicoli, postu administrativa Vera Cruz, munisípiu Dili, Hipólito Marques Ximenes, informa xefe família 1.116 iha suku Caicoli mak elizível atu simu subsídiu $200 ba uma kain ba fim do ano nian.
“Iha Caicoli ne’e, xefe família hamutuk 1.116 mak dokumentu kompleta ona no iha ona parte relevante hodi prosesu ba pagamentu nian ne’ebé tuir informasaun sei realiza iha novembru nia klaran tinan ne’e, maibé Itá hein husik Governu mak hala’o nia servisu,” Hipólito Marques Ximenes hateten ba Agência Tatoli, liuhosi telefónika, tersa ne’e.
Nia dehan, ida-ne’e xefe família sira-ne’e, ne’ebé rejistu ona iha livru suku nian to’o 28 fevereiru 2022 ne’e, no hosi ne’e mai oin ka hosi 28 fevereiru to’o mai agora, sei la hetan direitu ba subsídiu refere.
Dekretu-Lei númeru 37/2022 hateten katak subsídiu ne’e sei atribui ba uma kain iha Timor – Leste. Não é bem critério maibé iha Dekretu-Lei ne’e hateten katak sé mak sai benefisiáriu ne’e mak uma kain sira-ne’ebé rejistu iha livru suku nian to’o loron 28 fevereiru 2022.
Maibé, nia dehan, sei la taka dalan ba família foun ne’ebé foin harii uma-kain bele rejistu iha suku ne’e, tanba Estadu no Governu mós daudaun ne’e planu no halo ona sensu uma kain hodi hatene nia populasaun hira mak iha Timor-Leste.
Baze fundamentál atu fó subsídiu $200 ne’e hosi Dekretu-Lei númeru 37/2022 ne’ebé hateten katak subsídiu hosi Estadu ne’e ba uma kain sira hotu iha Timor-Leste no désimu terseiru ne’e aplika ba funsionáriu públiku de’it.
Benefisiáriu ba subsídiu $200 ba fim do ano ne’e hamutuk 339,110 ho montante $67.8.
Jornalista : Osoria Marques
Editór : Cancio Ximenes
