COVALIMA, 25 outubru 2022 (TATOLI)–Administradór munisípiu Covalima, Francisco de Andrade, hamutuk ho administradór postu administrativu Maucatar, diretór PNDS Covalima entrega xave ba benefisiáriu Uma Kbiit Laek (UKL) tinan fiskál 2021 iha aldeia Matao, suku Matai, postu administrativu Maucatar, munisípiu Covalima.
“Ha’u hanesan autoridade lokál tanba iha postu Maucatar simbolikamente sira inaugura ona UKL tinan fiskal 2021 iha suku Belekasak, maibé iha momentu konstrusaun UKL ida-ne’e seidauk finaliza, entaun ohin ha’u mai reforsa entrega xave ba benefisiáriu ne’e,” Francisco de Andrade hato’o ba jornalista sira, iha suku Matai, tersa ne’e.
Hafoin entrega xave ba benefisiáriu, administradór mós hato’o agradesimentu ba Governu liu-liu ba servisu PNDS iha Covalima tanba ho orsamentu sira-ne’e bele kompleta mobiliáriu uma-laran hanesan kama, armáriu, jelera ba benefisiariu UKL.
Diretór PNDS Covalima, Filipe Cardoso, hateten implementasuan UKL ba faze dahuluk iha tinan fiskal 2021 iha postu administrativu Maucatar iha suku haat konklui ona, tanba iha suku Matai entrega ona xave ba benefisiáriu sira.
“Ohin, ita entrega xave ba benefisiáriu uma tolu ne’ebé mak implementa iha suku Matai, hamutuk ho autoridade sira, ho ekipa jestaun suku, ohin kulturamente konstrusaun UKL ne’ebé uma kompleta ho mobiliáriu uma-laran iha suku Matai finaliza,” nia informa.
UKL tolu ne’ebé entrega ba benefisiariu sira-ne’e ho tipu uma sira hanesan tipu uma 48 rua no 37 ida, ne’ebé utiliza orsamentu tinan fiskal 2021 hamutuk $49.000 .00
Reprezentante Benefisiariu UKL, Juleta Freitas, hato’o agradesimentu ba VIII Governu Konstitusionál hodi tau matan ba ema kbiit laek sira, tanba polítika Governu bele konstrui uma kbiit laek ba sira hodi bele hela iha mahon ida di’ak.
“Ami kontente bainhira Timor ukun rasik an, ami bele sai benefisiáriu ba Uma kbiit laek (UKL) tanba kondisaun ha’u-nia uma ladi’ak ona, ami atu hela,” nia dehan.
Jornalista : Celestina Teles
Editór : Cancio Ximenes
