DILI, 25 outubru 2022 (TATOLI)—Ministériu Finansa (MF) liuhosi Diresaun Jerál Estatístika (DGE, sigla portugés) fó sai mudansa Índise Presu Konsumidór (IPK) iha setembru 2022 nian sa’e ba +0,1%.
“Kompara ba agostu 2022 tun -0,1%. Mudansa presu grupu hotu +0,1% tanba hetan kontribuisaun hosi grupu ekipamentu no manutensaun mobiláriu uma-laran +1,1%, ba alkólika no tabaku +0,6%, ba transporte -0,7, no komunikasaun -0,1 sai hanesan mudansa kontráriu ba inflasaun grupu hotu,” refere nota komunikadu ne’ebé Agência Tatoli asesu, tersa ne’e.
Grupu hahán no bebida la’os alkólika 0,0% laiha mudansa tanba hetan balansu negativu hosi sub-grupu foos -0,4%, modo-tahan -0,1%, no ai-fuan -0,9%.
Notísia relevante: IPK grupu hotu tun -0,1% iha agostu kompara ho jullu
Ba balansu pozitivu maihosi sub-grupu susu-been, keiju, no manu-tolun +1,2%, masin-midar, marmelada, bani been, cokolate no hahán midar +0,6%, no mina no bokur +0,5% no sub-grupu sira ne sai hanesan mudansa balansu ba inflasaun grupu hahán no bebida la’os alkólika.
Mudansa persentajen IPK anuál sa’e +7,9% kompara fulan setembru 2022 ho setembru 2021, hetan kontribuisaun hosi grupu hahán no bebida la’os alkólika +8,2%, transporte +14,6%, alkólika no tabaku +26,6%, uma +2,7%, ekipamentu no manutensaun mobiliáriu uma-laran +4,3%, rekreasaun no kultura +2,2%, saúde +1,0%, no edukasaun +2,4% ba anuál setembru 2022.
Ba grupu hatais no sepatu -0,7% sai hanesan mudansa kontráriu ba inflasaun grupu hotu ba anuál setembru 2022.
Nune’e, inflasaun tradeable sa’e +0,2% no non-tradeable tun -0,2% iha mensál kompara entre setembru 2022 ho agostu 2022.
Inflasaun tradeable sa’e +10,9% no non tradeable sa’e +1,0% iha anuál kompara entre setembru 2022 ho setembru 2021.
Jornalista : Arminda Fonseca
Editora : Julia Chatarina
