PNDS Covalima finaliza ona UKL 59 no unidade tolu seidauk konstrui
COVALIMA, 25 outubru 2022 (TATOLI)–Diretór Programa Nasionál Dezenvolvimentu Suku (PNDS) Covalima, Filepe Cardoso, informa konstrusaun Uma Kbiit Laek (UKL) 2021 hamutuk 90 ne’e ekipa tékniku finaliza ona uma 59, 31 atinje 90% no unidade tolu (3) seidauk halo konstrusaun.
“Konstrusaun UKL unidade 90 ne’ebé implementa 2021 ne’e, ekipa téknika PNDS finaliza unidade 59, konstrusaun unidade 31 atinje ona kuaze 90% no unidade tolu (3) iha aldeia Horba, suku Lepo, postu administrativu Zumalai seidauk halo konstrusaun,” Diretór PNDS Covalima, Filepe Cardoso, hateten ba jornalista sira, iha suku Matai, tersa ne’e.
Razaun ekipa Tékniku Programa Nasionál Dezenvolvimentu Suku (PNDS) Covalima seidauk konstrui Uma Kbiit Laek unidade tolu iha aldeia Horba, suku Lepo, tanba iha aldeia refere komunidade la asesu estrada, nune’e difisil atu transporta materiál konstrusaun to’o iha fatin ne’eba.
Maske seidauk finaliz, ekipa tomak jestaun suku sempre halo ezersísiu no define kalendáriu implementasaun nune’e bele finaliza iha tempu badak nia laran.
“UKL uidade 90 ne’ebé implementa iha tinan 2021, to’o ohin loron seidauk finaliza tanba iha kestaun balun mak fornesedór balun hetan impedimentu ba iha presu materiál konstrusaun iha mudansa no klima,” nia dehan.
Xefi suku Lepo, Aniceto Ferreira, rekuiñese iha suku ne’ebé nia lidera seidauk konstrui Uma kbiit Laek (UKL) unidade tolu ba faze dahuluk iha tinan fiskal 2021 nian, tanba laiha estrada atu transporta materiál konstrusaun.
“Iha ha’u-nia suku Lepo seidauk konstrui UKL unidade tolu (3) faze dahuluk tinan fiskál 2021 nian, ho razaun tanba problema laiha estrada atu transporta materiál konstrusaun ba aldeia refere. Maske iha momentu ha’u hakarak muda maibé tanba labele muda, entaun to’o ohin loron seidauk konstrui,” nia dehan.
Tanba ne’e, xefi suku mós organiza komunidade ho volontáriu hodi loke estrada ne’ebé aldeia Horba, suku Lepo agora bele transporta ona materiál konstrusaun Uma Kbiit Laek.
“Ha’u organiza komunidade kee estrada ho voluntáriu, nune’e ami konsege to’o iha aldeia ne’e. Tanba implementasaun PMOPA iha suku ne’e, ha’u mós fó prioridade hodi hadi’a estrada nune’e hein de’it ona ekipa munisípiu atu mai haree,” nia hateten.
Implementasaun Uma Kbiit Laek (UKL) unidade 90 ne’ebe implementa iha tinan fiskal 2021 ho tipu uma 48 metru kuadradu hamutuk 65, tipu uma 37 metru kuadradu hamutuk 25.
Ekipa programa nasional dezenvolvimentu suku (PNDS) iha Covalima konstrui UKL 90 iha postu administrativu hitu ne’ebe implementa iha suku 30 ho nia orsamentu hamutuk $1,491,000.00.
Jornalista : Celestina Teles
Editór : Cancio Ximenes
