OÉ-CUSSE, 25 outubru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, tersa ne’e simu relatóriu rua kona-bá rezultadu prosesu Ró Haksolok nian hosi Koordenadór Interinu ba Unidade Tékniku Akompañamentu ba prosesu Ró Haksolok, Rui da Silva Pinto.
“Ohin loron ne’e, ha’u simu rezultadu hosi Koordenadór Tékniku, iha relatóriu rua relasiona ho Ró Haksolok. Relatóriu dahuluk refere ba inspesaun no avaliasaun kondisaun kontrutiva Ro Haksolok nian, no relatóriu daruak mak husi teste estabilidade,” nota imprensa ne’ebé Agência Tatoli asesu hosi Gabinete Prezidente Autoridade RAEOA.
Ezekutivu ne’e informa, rezultadu iha relatóriu sira nee, tuir loloos ekipa téknika RAEOA revee ona iha vizita iha Portugál no mós istória ba Ró Haksolok iha loron 26 setembru 2022.
“Tanba iha momentu ne’ebá, ita seidauk hetan entrega hosi entidade independente ne’ebé hala’o avaliasaun, nune’e maske haree ona kondisaun loloos kona-bá Ro Haksolok, sente kapaas loos fó-sai ba públiku liutiha asinatura hotu,” nota imprensa ne’e hateten.
Kona-ba konteúdu rezultadu relatóriu avaliasaun ne’e, Prezidente Bano akresenta, ne’e la halai sees hosi relatóriu ne’ebé prodús durante períodu konstrusaun paradu.
“Loos duni iha vídeu oinoin ne’ebé sirkula iha mídia sosiál, maibé buat-ne’ebé fahe iha ne’ebá la hanesan buat-ne’ebé há’u nia ekipa haree, kona-ba prova estabilidade Ró Haksolok nian, prienxe no satisfaz rekizitu hotu ne’ebé impoin tuir padraun konstrusaun europeu, nune’e ita bele re-inísia prosesu konstrutivu, ne’eb’e ha’u kompromete atu haree fali liuhosi dalan adekuadu atu partilla konteúdu informasaun relatóriu inspesaun Ró ba dala-ikus hodi hapara rumor no asegura katak ema labele hamosu konfuzaun iha publiku nia leet, nia akresenta.
Notísia relevante: Alkatiri: “Ita hahú prepara tripulante ba Ró Haksolok”
Jornalista: Abílio Elo Nini
Editór: Evaristo Soares Martins
