COVALIMA, 26 outubru 2022 (TATOLI)–Estudante Eskola Bázika Sentrál (EBC, Sigla Portugés) 11 de Marsu iha postu administrativu Maucatar ne’e partisipa ezame nasional ho laran triste no sente la seguru tanba menus meza no kadeira, nune’e uza kadeira masa nakfilak ba meza hodi hakerek iha leten.
“Ami sente triste tanba ami menus karteira eskolár hahú iha sétimu ano, to’o ohin loron ami partisipa ezame nasionál ho la seguru ba ami atu prenxe matéria ho di’ak tanba ami uza kadeira masa sai meza hodi hakerek iha leten,” Estudante Deminisia Cardoso Perreira hato’o ba jornalista sira, iha EBC Maucatar, kuarta ne’e.
Eskola ida-ne’e la’ós foin mak hasoru difikuldade menus kardaeira no meza eskolár maibé hahú hosi sétimu ano to’o ohin loron mós tuir ezame nasionál uza de’it kadeira meza nakfilak ba meza hodi hakerek iha leten.
Estudante Arcanjo Amarál reforsa, eskola ida-ne’e la’ós foin mak hasoru difikuldade menus kadeira no meza eskolár maibé hahú kedas sétimu ano to’o ohin loron.
“Ami la’os foin mak hasoru difikuldade laiha kadeira eskolár maibé hahú kedas sétimu ano to’o ohin loron mós nafatin menus kadeira no meza,” nia dehan.
Diretór EBC Maucatar, Evaristo do Carmo, rekuñese hodi ko’alia ho matan-been tanba haree kondisaun estudante sira bainhira partisipa ezame nasionál ne’e ladún kria kondisaun ba estudante sira hodi ezame ho seguru.
Antes atu realiza ezame nasionál, diretór mós hato’o ona ba ministériu relevante maibé to’o ohin loron seidauk iha resposta.
“Eskola ida-ne’e menus kadeira eskolár ba estudante sira, ita haree realiza ezamen nasionál ne’e estudante sira uza kadeira masa sai fali meza. Balun to’o oin halai atu monu tan, tanba presiza atu tau atensaun ba estudante sira,” nia dehan.
Estudante EBC Maucatar 11 de Marsu hamutuk na’in-55 ne’ebé kompostu mane na’in-18 no feto30-resin.
Jornalista : Celestina Teles
Editór : Cancio Ximenes
