iklan

NASIONÁL, POLÍTIKA

Selebra loron nasionál feto, SEII sei realiza sertame ba estudante sira

Selebra loron nasionál feto, SEII sei realiza sertame ba estudante sira

Sekretária Estadu Igualdade no Inkluzaun (SEII), Maria do Rosário Fatima Correia, halo konferénsia imprensa hodi komemora loron nasionál feto ne’ebé kada tinan selebra iha 03 novembru. Imajen Tatoli/Nelia Fernandes.

DILI, 26 outubru 2022 (TATOLI)— Sekretária Estadu Igualdade no Inkluzaun (SEII), Maria do Rosário Fatima Correia, hateten tuir plánu SEII sei komemora loron nasionál feto ba dala-46 (03 novembru), ho atividade sertame ba estudante sira iha ensinu sekundáriu Paulus IV, Canossa, 04 Setembru no 12 Novembru iha Dili.

Antes atu halo halo atividade sertame, sei hala’o misa agradesimentu ba eroiana no eroi sira-ne’ebé mate atu liberta sira-nia rai ida-ne’e, atu husu nafatin sira-nia espíritu nune’e bele hatutan no kontinua nafatin luta ba dignidade. Atividade seluk mak sei kari ai-funan iha Tasi ibun iha área Palásiu Governu nia oin.

“Ami sei halo atividade sertame ba estudante sekundária iha eskola Paulus IV, Canossa, 04 Setembru no 12 Novembru, atu estudante sira atu bele hatene didi’ak saida mak asuntu igualdade jeneru no inklusaun. Ida-ne’e mak ami fó ba sira atu hatene kle’an liu, karik aban bainrua sira ramata sira-nia estudu sira bele hatene. Tanba, iha Timor ita seida’uk iha fakuldade ba asuntu igualdade, maibé karik sira iha biban ba fatin seluk sira mós hatene uitoan kona-ba asuntu igualdade jeneru no inkluzaun,” Maria do Rosário Fatima Correia hateten liuhosi konferénsia imprensa ne’ebé hala’o iha Salaun Enkontru Maria Gorreti, Caicoli, Dili, kuarta ne’e.

Aleinde atividade sertame sei iha mós kompetisaun korru ba dona de casa sira iha postu administrativu haat (4) no atividade ne’e oinsá dona de casa sira bele kanta mós marsa ba feto sira.

Nune’e mós, SEII sei halo talk show ne’ebé sei bolu oradór sira hosi Frente Armada maibé feto, Frente klándestina no Frente diplomata.

Aleinde ne’e, SEII sei loke feira ba inan sira-ne’ebé hakarak atu faan sira-nia produtu hanesan tais, hahan produtu lokál no buat ne’ebé sira prepara durante ne’e, hosi grupu ne’ebé SEII rejista ona no sei la’o loron ida tomak.

“Ami sei konvida feto sira-ne’ebé sai hanesan banda múzika, sira mak sei toka no hosi ne’e konvida mós Maria Vitória (Marvi” atu oferese kanta ba loron feto nasionál ne’e.

Maske nune’e, iha komemorasaun Loron Nasionál Feto iha tinan ne’e Sekretária Estadu Igualdade no Inkluzaun (SEII) hili tema “Feto Prontu Lidera”, katak tempu ona atu feto sira brani no mosu iha pálku polítika no konkore iha eleisaun sira atu hili sira-nia an no foti mós desizaun.

“Ita haree katak tema ida-ne’e importante, tanba tinan oin ita sei iha festa demokrásia boot ne’ebé ita sei iha eleisaun Parlamentár no eleisaun xefe suku,” nia dehan.

Ho objetivu, oinsá atu kontinua hala’o advokásia hodi hamoris nafatin espíritu luta ba dignidade feto Timor no sosiedade patriarkál ne’ebé kontinua rejista hodi fó espasu no oportunidade atu feto sira hola parte iha prosesu dezenvolvimentu iha setór oioin.

Atu promove feto sira-nia luta hodi hetan direitu tuir dalan justisa, igualdade ne’ebé inkluziva no liberdade no lia-loos moris ho di’ak, dignu no promove feto sira liuhosi dezenvolve kapasidade hodi akompaña no apoiu rekursu atu fó promosaun hodi moris.

“Ida-ne’e, sira bele garante katak sira bele partisipa iha kualker atividade liuhosi envolvimentu feto hodi foti desizaun iha instituisaun públiku, politika setór privadu no doméstika nian,” nia dehan.

Tanbasá mak Governu deside loron 03 novembru nu’udar loron nasionál feto, nia hatán, loron nasionál feto Timor-Leste nu’udar loron ida atu fó rekuiñesimentu ba feto Timor-Leste sira-nia luta iha rezisténsia nia laran, liu-liu ba saúdoza Maria Tapó.

Maria Tapó nu’udar eroina ida-ne’ebé hosi Organizasaun Populár Feto Timorense (OPMT, sigla portugués) ne’ebé absorve politika OPMT hodi luta ba dignidade feto hasoru militár Indonézia.

Maria Tapó moris iha Tapó, munisípiu Bobonaro, feto iliterada no ema simples ida-ne’ebé sai hanesan figura ezemplár ida ba feto maluk sira no Primeira Eroina ba Luta Libertasaun Nasionál.

“Molok Indonézia invade ofisiálmente ita-nia rain iha loron 07 dezembru 1975, iha tiha ona infiltrasaun inimigu iha área fronteira. Iha tempu ne’ebá Forsa Armada Libertasaun Nasionál Timor-Leste (FALINTIL) halo kedas rezisténsia. Ho ida-ne’e, Maria Tapó hanesan feto ida brani no feen ida ezemplár fó apoiu makaas tebes ba nia kaben iha liña de fogo,” nia dehan.

Iha loron 03 Novembru tinan 1975, bainhira nia kaben han hela, Maria Tapó mak troka nia kaben hodi halo vijilánsia ho kilát iha liman. Bainhira halo hela vijilánsia derrepente inimigu halo asaltu, haree ba situasaun hanesan ne’e zaúdoza Maria Tapó ho aten bráni foti asaun reziste hasoru inimigu maibé tanba inimigu tiru-kona feto maluk ne’e no nia mate kedas iha liña de fogo.

Hafoin nia mate, tuir sasin na’in-tolu (3), hanesan Paulino Viegas Tilman, Domingos Mau no Santina Fernandes hato’o katak Maria Tapó nia feto maluk sira seluk ne’ebé sira la’o hamutuk haruka kedas karta ba Comité Centrál FRETELIN ho lian portugués deklara nune’e, “Nós as Mulheres de Tapó não rendemos, nem renderemis, lutaremos até a nossa última gota de sangue– “Ami feto Tapó sei la rende, ami sei la rende nafatin, ami sei funu nafatin, ami sei funu to’o ami-nia raan turuk ikus nian”.

Hafoin simu tiha karta ne’e, Primeiru Ministru Repúblika Demokrátika Timor-Leste iha tempu ne’ebá, Saudozu Nicolau Lobatu hala’o inisiativa iha ai-laran iha tinan 1976 hodi deside loron 03 Novembru sai nu’udar Loron Nasionál ba Feto Timor-Leste.

Ho nune’e, iha tinan 1977 hosi sorumutu Comité Centrál FRETELIN dekreta Rezolusaun ida ba loron 03 fulan Novembru sai nu’udar Loron Nasionál ba feto Timor-Leste no hahú hosi ai-laran, tinan-tinan komemora Loron Nasionál ba Feto.

Hafoin Timor-Leste Restaura Independénsia iha tinan 2002, iha Kongresu Nasionál Feto daruak, ne’ebé partisipa hosi organizasaun feto hotu-hotu iha Timor-Leste. Iha biban ne’e, maluk feto sira ezije katak Timor-Leste tenke iha loron nasionál ba feto atu fó valór no rekuiñesimentu ba feto sira tanba sira mós fó kontribuisaun makaas ba luta ba Libertasaun Nasionál hosi tinan 1075 to’o 1999.

Ezijénsia ne’e sai hanesan plataforma hosi Kongresu Nasionál Feto daruak no hato’o ba Parlamentu Nasionál hodi foti-desizaun. Ikus mai, Parlamentu Nasionál aseita no estabelese Lei Númeru 10/2005 iha 10 agostu, ne’ebé deside loron 3 fulan Novembru sai nu’udar Loron Nasionál ba Feto Timor-Leste.

Prezidente Komisaun Organizadora ba Komemorasaun Nasionál Feto Timor-Leste, Francisca S, de Sousa, informa orsamentu ba loron selebrasaun ida-ne’e menus hosi Millau$20, ho orsamentu ida-ne’e katak atividade sira sei bele la’o ho di’ak tanba ladun gasta demais iha viajen.

Diretór Jerál Sekretária Estadu Igualdade no Inkluzaun (SEII), Armando da Costa, hateten atividade ne’ebé SEII halo iha komemorasaun loron nasionál feto ne’e nasionálmente selebra iha Dili, maibé SEII mós koloka orsamentu ba kada munisípiu hamutuk rihun $2, liuhosi Grupu Traballu Jeneru iha munisípiu no pontu fokál munisípiu, atu sira ida-idak organiza atividade iha nível munisípiu nian.

Entretantu, partisipante ba komemorasaun loron nasionál feto ne’e kompostu hosi Prezidente Repúblika, José Ramos Horta, Prezidente Parlamentu Nasionál, Aniceto Longuinhos Guterres Lopes, Vise-Primeira Ministra, Armanda Berta dos Santos., membru deputadu, membru Governu, korpu diplomátika, Ajénsia Internasionál sira, Sosiedade Sivil, Polísia Nasionál Timor Leste (PNTL), F-FDTL, Prezidente Autoridade Munisípiu Dili, administradór postu autoridade suku no feto potensiál iha munisípiu, joven feto no mane, estudante no komunidade.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!