Sentru Saúde Laleia rejista pasiente ISPA na’in-99
DILI, 27 outubru 2022 (TATOLI)—Xefe Sentru Saúde Laleia, Munisípiu Manututo, Jose da Costa, informa durante fulan setembru, rejista moras Infesaun Vias Respiratoriu Aguda (ISPA) na’in-99 no diareia aguda na’in-15.
“Iha fulan setembru ne’e ita rejista moras aas liu mak Infesaun Vias Respiratoriu feto 63, mane 36 hamutuk 99, no tuir mak teben agudu feto 13, mane rua hamtutuk 15”, hateten Xefe Sentru Saúde Laleia ne’e ba Agência TATOLI via telefónika, kuarta ne’e.
ISPA no diareia kuaze afeta ba ema boot no labarik sira ho menus tinan lima mai kraik. Ho sintoma ISPA hanesan mear, isin-manas, inus-been no ulun moras oituan.
Tanba nne’e, nia husu ba komunidade sira atu hakbesik ba fasilidade saúde bainhira sente sintoma ISPA no diareia hodi hetan tratamentu saúde hosi husi profisionál saúde sira.
Atu prevene moras ISPA no diareia mak tenke uza mascara, fase liman bebeik ho sabaun bebeik, nono bee tasak no morna hafoin taes hodi hemu no konsumu ai-han nutritivu
“Ita presiza ijéniku individuál ne’ebé saudavel ba ita nia-an rasik nomós ba família sira. Kona ba ai-moruk ita sufisiente hodi fó ba pasiente sira iha sentru saúde Laleia ida ne’e”, katak.
Daudaun, Profisionál Saúde ne’ebé mak hala’o kna’ar iha sentru saúde Laleia hamutuk 30, hosi númeru ne’e Enfermeiru nain-hitu, médiku nain-haat, parteira tolu no tékniku aliadu na’in-16.
Jornalista : Felicidade Ximenes
Editór : Florencio Miranda Ximenes
