BAUCAU, 27 outubru 2022 (TATOLI) – Servisu Munisipál Solidariedade Sosiál Baucau, kinta ne’e, divulga dekretu-lei númeru 37/2022, kona-ba subsídiu ‘tinan nia rohan’ ba ba líder komunitária suku 59 iha Baucau.
Diretór Servisu Munisipál Solidaridade Sosial Baucau, Guido Ricardo Belo, esplika, atividade refere realiza atu fahe informasaun liga ho prosesu pagamentu, bazea ba dekretu-lei 37/2022 no diploma konjunta nu’udar dokumentu legál ne’ebé orienta kona-ba prosedimentu pagamentu.
“Ne’e importante tanba iha prosesu pagamentu, ekipa tékniku inteira didi’ak tanba xefe suku no pesoál administrasaun suku (PAS) iha papél importante durante prosesu pagamentu la’o, nune’e antes implementa sira tenke hatene prosedmentu implementasaun polítika nee rasik, liuliu hatene papél tékniku pagamentu,” Diretór Servisu Munisipál Solidaridade Sosiál hateten iha Vila nlNova, kinta ne’e.
Objetivu hosi divulgasaun dekretu-lei númeru 37/2022, loron 25 maiu, kona-ba pagamentu subsídiu ba uma-kain ho valor orsamentu $200 ba xefe suku sira atubele intende no informadu sobre porsedimentu legál sira.
Xefi suku Soba, postu administrativu Laga, Francisca Monica de Fátima, hateten atividade refere importante ba autoridade suku tanba tuir dekretu-lei fó garantia ba autoridade suku sira atu foti desizaun bainhira prosesu pagamentu realiza.
“Ami iha direitu atu halo reklamasaun ba dadus sira-ne’ebé mak ladún loos,” Monica Fátima hateten.
Suku soba rasik iha benefisiáriu hamutuk 637, ne’ebé antes ne’e submete ona ba autoridade munisípiu.
Tuir dadus hosi Ministériu Solidaridade Sosiál no Inkluzaun (MSSI) tótal benefisiáriu ne’ebé atu simu subsidiu $200 hamutuk 339.110 ho tótal orsamentu purvolta tokon $6.8.
Jornalista : Natalino Belo
Editór : Evaristo Soares Martins
