Administradór Maucatar observa traballadór PMOPA faze daruak iha Ogues

COVALIMA, 27 outubru 2022, (TATOLI)—Administradór postu administrativu Maucatar, Constantino do Carmo Cardoso, observa traballadór servisu implementa programa Mão de Obra Postu Administrativu (PMOPA) faze daruak, iha Suku Ogues, postu administrativu Maucatar, munisípiu Covalima.
“Ha’u-nia prezensa ohin observa ba traballadór sira tanba ami realiza PMOPA hanesan administradór nia papel importante atu kontrola servisu la’o ho di’ak no susesu ba komunidade,” Constantino do Carmo Cardoso hateten ba Agência Tatoli, iha suku Ogues, sesta ne’e.
Implementasaun PMOPA faze daruak iha postu administrativu Maucatar ne’e kada grupu ida traballadór na’in-20, nune’e traballadór hamutuk 840 servisu durante loron 10.
PMOPA prióridade ba programa halo manutensaun no hamoos esgotu, manutesaun hamoos lixu iha fatin públiku, tanba matadalan PMOPA ko’alia klaru katak labele halo konstrusaun foun maibé halo manutensaun de’it no hamoos esgotu.
Implmentasaun PMOPA faze daruak ho totál hamutuk $545.000-resin ne’ebé aloka ba item sira hanesan selu ba kaminoneta, ekipa tékniku, sosa ekipamentu protesaun no selu traballadór sira.
Ministériu Administrasaun Estatál (MAE), transfere orsamentu ba Programa Mão de Obra Postu Administrativu (PMOPA) iha Covalima hamutuk $782,102 ba konta bankaria munisípiu nian.
Jornalista : Celestina Teles
Editór : Cancio Ximenes

