DILI, 28 outubru 2022 (TATOLI)–Ministériu Edukasaun Juventude no Desportu (MEJD) prevee ona fundu millaun $7 resin atu prepara programa subsídiu bolsa méritu ba estudante mellór klasifikadu iha tinan ida ne’e iha nasionál no munisipál.
Diretór Jerál Administrasaun no Jestaun Finansa hosi MEJD, Antoninho Pires, hateten, subsídiu bolsa méritu ne’ebé ministériu sei prepara atu oferese ba estudante nível ensinu báziku, ensinu sekundáriu jerál no ensinu sekundáriu tékniku vokasionál ne’ebé tama klasifikasaun.
“Ita sei oferese subsídiu bolsa méritu ba estudante sira maibé sira ne’ebé hetan valór di’ak iha rezultadu ezame nasionál no ezame pasajen klase mak sei hetan prémiu hosi ministériu,” Diretór informa iha ninia knaar fatin, SEJD, Vila Verde, sesta ne’e.
Subsídiu bolsa méritu sei fahe ba grupu rua hanesan grupu nasionál bazeia ba rezultadu nasionál no grupu munisipál sei haree ba rezultadu pasajen klase.
Notísia relevante: Estudante 58.132 iha territóriu nasionál sei tuir ezame nasionál
Daudaun ne’e ekipa ministériu hahú akompaña nafatin prosesu ezame sira hosi rezultadu ezame nasionál inklui ezame pasajen klase, ne’ebé tempu besik sei ramata bazeia ba kalendáriu eskolár, ne’ebé sei finaliza iha novembru nia laran no subsídiu prémiu bolsa méritu ba estudante mellór klasifikadu ne’e sei atribui ba estudante sira iha dezembru nia laran.
“Atu atribui ba estudante mellór klasifikadu sira, ministériu seidauk halo kategoria. Ministériu sei deside iha tempu besik tuir nível ka grupu ne’ebé iha ona no estudante ne’ebé tama iha mellór klasifikasaun sira ninia prémiu sei transfere liuhosi konta bankária estudante.
Enkuantu, programa apoiu subsídiu ba estudante mellór sira nu’udar meiu ida hodi atrai estudante sira atu estuda maka’as liután hodi bele halo kompetisaun iha ida-idak ninia eskola atu nune’e bele hatoman estudante sira lee no estuda barak liután.
Jornalista : Tomé Amado
Editora : Julia Chatarina
