PMOPA iha postu Baucau sei hahú iha fulan-novembru
BAUCAU, 28 outubru 2022 (TATOLI) – Programa Mão de Obra Postu Administrativu (PMOPA) iha administrasaun postu administrativu Baucau Vila, munisípiu Baucau sei implementa faze daruak iha fulan-novembru.
Administradór postu administrativu Baucau Vila, munisípiu Baucau, Isencinio António da Silva, hateten, liuhosi enkontru fó sai ona oreintasaun ba xefe suku sira atu submete tipu atividade hodi hein orsamentu faze daruak ne’ebé tuir planu sei realiza iha fulan-novembru.
“Ami-nia ekipa sei tún halo verifika depois sei halo estimasaun orsamentu inklui traballadór sira atu serbisu,” Administradór postu administrativu Baucau Vila informa ba Agência TATOLI iha Vila Nova, sesta ne’e.
Parte administrasaun sei kontinua halo kalkulasaun ba sub atividade no tótal traballadór iha kada suku inklui durasaun loron implementasaun bazea ba matadalan programa hanesan rekuperasaun ekonomia kada suku.
Kada suku mínimu implementa atividade tolu to’o haat hanesan limpeza jerál, reparasaun estrada, hamos baleta inklui kuda ai-horis liuliu iha bee-matan.
Tuir planu iha faze daruak hosi suku 11 sei implementa atividade hamutuk 41 inklui grupu 41 no estimasaun tótal traballadór purvolta 600-resin.
Dezde faze dahuluk remata iha loron 26 setembru no remata ona rekolla administrasaun inklui prosesa ona pagamentu ba konta bankária kada suku 11 iha Baucau Vila.
“Depois ita sei halo took avaliasaun ruma mak bele identifika falla maibé durante implementasaun kontinua halo tuir indikadór PMOPA nian,” nia informa.
PMOPA faze dahuluk iha postu administrativu Baucau vila implementa atividade hamutuk 33 hanesan limpeza jerál, reparasaun estrada eskala kiik ne’ebé kada suku implementa ba grupu tolu, ho totál traballadór hamutuk 660.
Antes ne’e, lansamentu ba programa refere iha loron 31 agostu no hahú implementa iha loron 01 fulan-setembru no implementa durasaun loron-18 ne’ebé kada loron ema-ida $5 no xefe grupu na’in-ida $7.
Tuir planu PMOPA faze daruak, postu Baucau Vila sei hala’o reuniaun konsellu postu hodi identifika atividade tuir kondisaun klima hanesan tempu udan presiza aumenta tán atividade kuda ai-oan tuir estrada públiku no limpeza barranjen.
“Fulan-novembru ita tenke finaliza no submete kedas relatóriu,” Isencinio da Silva akresenta.
Orsamentu ba Programa refere faze daruak hamutuk $ 6.870,665 hosi tótal orsamentu $13.741,33 ne’ebé iha faze dahuluk gastu ona $ 6.870,665 kompostu orsamentu operasionál 5% no 95% ba kustu investimentu.
Jornalista : Natalino Belo
Editór : Evaristo Soares Martins
