iklan

NASIONÁL, POLÍTIKA

PR Horta no Alkatiri diskute buka solusaun timoroan terus iha Portugál

PR Horta no Alkatiri diskute buka solusaun timoroan terus iha Portugál

Sekretáriu Jerál Partidu FRETILIN, Mari Alkatiri. Imajen Tatoli /Egas Cristovão.

DILI, 28 outubru 2022 (TATOLI)—Prezidente Repúblika (PR), José Ramos Horta, sesta ne’e, simu audénsia ho Eis Primeiru-Ministru (PM) no Sekretáriu Jerál Partidu FRETILIN, Mari Alkatiri. hodi kdiskute oinsá buka solusaun ba traballadór ka migrante timoroan ne’ebé terus iha Portugál.

Tanba iha loron 29 outubru ne’e Xefe Estadu sei hala’o vizita Estadu ba Portugál tanba hetan konvite hosi nia ómologu Prezidente Repúblika Portugál, nune’e Eis PM Alkatiri fó opiniaun kona-ba situasaun timoroan sira-nian iha Portugál ne’ebé daudaun ne’e hasoru problema, nune’e iha vizita ne’e sai mós ajenda PR nian atu ko’alia hodi solusiona.

“Prezidente Repúblika atu ba Portugál, ha’u-nia preokupasaun ba ita-nia sidadaun timoroan ne’ebé kontinua ba de’it Portugál boot tebes, entaun mai hamutuk ho Prezidente Repúblika fó opiniaun atu rezolve buka solusaun halo nusa, ne’e mak ha’u husu atu ko’alia molok nia (Prezidente Repúblika) atu ba,” Alkatiri hateten ba jornalista sira hafoin ramata enkontru iha Palásiu Prezidensiál Nicolau Lobato, Bairru Pite, Dili.

Nune’e, Mari Alkatiri hato’o proposta ba Xefe Estadu rasik konkorda ideia bainhira iha vizita Estadu ne’e hodi ko’alia ho parte Portugál atu fó solusaun.

“Ami ko’alia ha’u fó proposta no nia (PR) konkorda ka simu ho ideia proposta ha’u fó sei lori ba Portugál atu ajuda fó solusaun ida temporária tenke iha solusaun depois hahú prosesu ida bele fó solusaun permanente. Tenke iha solusaun ba toba iha jardin ne’e agora rai malirin komesa ona ne’e susar tebes, ida ne’e mak preokupasuan boot,” nia dehan.

Mezmu nune’e, Eis PM ne’e la esplika detallu proposta maibé liuliu oinsá kria kondisaun ba timoroan sira bele apreende buat ruma iha Portugál hahú ho lingua portugés no serbisu ruma sira hakarak halo iha ne’eba, tenke iha tiha oportunidade atu hetan formasaun.

“Depois sira-ne’ebé atu ba tan ne’e, ita halo hanesan agora daudaun atu ba Korea Súl ne’e fó uluk treinu iha ne’e lingua, treinu profisionál ne’ebé hotu-hotu iha direitu ba ne’ebé de’it labele ba fali ema-nia rai atu sai fali refujiadu. Ba atu kontribui lori sira-nia kbiit kapasidade atu hatudu ita mós iha talent,” nia hateten.

Eis PM ne’e hateten obrigasaun Estadu Timor-Leste atu trava ajénsia sira-ne’ebé fasilita tanba ida-ne’e tráfiku umanu ilegál ema sira sai vítima, balun selu osan lakon makaas nune’e tenke hapara parte polísia tenke atua.

Antes ne’e, Eis PM ne’e hala’o vizita ba iha Portugál hasoru malu mós ho Prezidente Repúblika Portugál, Marcelo Rebelo de Sousa, hodi ko’alia kona-ba situasaun migrante timoroan ne’ebé terus iha Portugál oinsá buka solusaun.

Jornalista: Nelson de Sousa

Editór: Cancio Ximenes

iklan
iklan

Leave a Reply

iklan
error: Content is protected !!