SASCAS apoiu rihun $20 ba Asosiasaun Vítima 1974-1999 hala’o kongresu nasionál
DILI, 28 outubru 2022 (TATOLI)—Koordenadór Ezekutivu Sekretariadu Asosiasaun Vítima 1974-1999, Domingos Pinto de Araujo Moniz, informa Servisu Apoiu Sosiedade Sivil no Auditória Sosiál (SASCAS, sigla portugés) apoiu rihun $20 ba Asosiasaun Vítima 1974-1999 hodi hala’o kongresu nasionál ba dala-IV iha munisípiu no nasionál.
“Haree ba ami-nia mandate, iha estatutu dehan tinan lima (5) mandatu hotu tenke halo kongresu no kongresu ne’e ami halo ba dala-haat ona. Hosi ne’e ami hetan apoiu fundu hosi SASCAS hamutuk rihun $20. Ne’ebé, komesa iha 2021 novembru, ami-hala’o pra-kongresu munisipál sira hotu no ikus mai kongresu nasionál ba loron ohin,” Domingos Pinto de Araujo Moniz hateten ba jornalista sira, iha salaun Centro Nacional Chega (CNC), Antigu Komarka Balide, Díli, sesta ne’e.
Durante mandantu hanesan Koordenadór Ezekutivu Sekretariadu Asosiasaun Vítima 1974-1999, nia parte halo rejistrasaun ba vitima sira liuhosi direjente munisipiu sira no halo verifikasaun, hosi ne’e liga ho liña ministeriál sira, liuhosi Centro Nacional Chega (CNC), kria ekipa ida hodi identifika no haree didi’ak vitima sira no vítima balun hetan ona apoiu.
“Apoiu ne’ebé iha hanesan apoiu pontuál ema ida hetan $500 ne’e, ema na’in-363 mak hetan ona. Hosi ne’e, apoiu ba grupu no grupu ida hetan rihun$5 ba ema-nain lima, nune’e grupu haat hetan ona no grupu tolu foin tama preparasaun,” nia hateten.
Aleinde ne’e, apoiu seluk hosi Governu ba vítima sira mak “Uma Memoria Esperansa” ne’e, vítima na’in-10 mak hetan no mós iha tempu COVID-19 ne’e, asosiasaun vítima fó apoiu nesesidade bázika ba vítima sira.
Ministru Asuntu Kombatente Libertasaun Nasional (MAKLN), Julio Sarmento da Costa ‘Meta Malik’, agradese ba estrutura tuan Asosiasaun Vítima 1974-1999 ne’ebé orsida ka aban ramata sira-nia mandatu, tanba ne’e karik estrutura tuan atu remata labele atu fó hela todan ba estrutura foun, maibé sai nafatin konsilleiru no apoiante ba estrutura foun atu la’o.
“Tanba, asosiasaun responsabilidade komun, la’ós responsabilidade individu. Tanba ne’e, fó hanoin no buka dalan,” nia dehan.
Tuir dadus, totál vítima ne’ebé durante rejista ona no agora daudaun iha baze dadus (data base) Centro Nacional Chega hamutuk 120 alestadu no vitima hamutuk ema rihun mak ninia prosesu sei la’o hela.
Enkuantu, kongresu nasionál ba loron rua ho tema “Hakbiit no dignifika direitu vitima hosi asesu ba justisa Agora no Futuru,” ne’e, partisipa hosi dirijente munisípiu 13 no pontu fokál estrutura postu 65 ne’e hamutuk 78.
Jornalista : Nelia Fernandes
Editór : Cancio Ximenes
