Servisu sosiál Covalima sensibiliza lei subsídiu $200 ba autoridade Covalima
COVALIMA, 28 outubru 2022 (TATOLI)–Servisu Asaun Sosiál Covalima sensibiliza dekretu-lei númeru 37/2022, 25 maiu, kona-ba subsídiu $200 ba uma kain ka fim do ano ba autoridade sira iha Covalima.
Diretór Sentru Asaun Sosiál Covalima, Agapito Asis, hateten objetivu hosi enkontru ohin loron ida-ne’e atu disemina informasaun kona-ba subsídiu $200 ba komunidade sira liuhosi instituisaun relevante no ba autoridade lokál sira iha Covalima.
“Ohin, importante tebes ba ita atu hasoru malu teknikamente, ita tenke fahe informasaun ba malu hodi sensibiliza baze legal, nune’e ita bele hatene kada responsabilidade sira iha implementasaun pagamentu subsídiu $200 ba uma kain ka fim do ano,” Agapito Asis, hato’o liuhosi diskursu iha salaun AMC, Sukaer Laran, sesta ne’e.
Governu aprova ona dektru-lei númeru 37/2022 kona-ba pagamentu subsídiu anuál ho universál, maibé iha mós grande opsaun sira hanesan ba uma-kain kbiit laek (ema vulneravel), funsionáriu ne’ebé nia saláriu $500 ba leten sei la hetan maibé saláriu menus hosi $500 bele hetan.
“Molok atu implementa, teknikamente ita tenke preparadu nune’e ita ne’ebé implementadór tenke iha kuiñesimentu di’ak kona-ba polítika ida-ne’e no tenke iha informasaun di’ak kona-ba ita-nia kompeténsia sira, ita mak na’in ba programa,” nia dehan.
Regra Prosesu pagamentu sira hanesan, xefe família tenke aprezenta dokumentu bazea ba rekezitu sira tuir diploma ministerial regulamentu subsídiu anuál. Bainhira dokumentu orijinál lakon ka hetan estragu hosi dezastre naturál, xefe família tenke prenxe formuláriu ne’ebé prepara.
Bainhira xefr família laiha tertóriu nasionál, tenke reprezenta hosi agregadu família ne’ebé naran rejistu iha fixa família, xefi família tenke informa ba xefe aldeia no xefe suku antes aprezenta justifikasaun bainhira la disponivel iha prosesu pagamentu.
Reprezenta agregadu família tenke prenxe formuláriu justifikasaun auzensia no deklarasaun subtituisaun ne’ebé prepara ona iha estasaun pagamentu no xefe família iha loron lima (5) atu aprezenta an iha estasaun pagamentu.
Dokumentu no rekezitu atu simu subsídiu mak hanesan fixa família orijinal no foto kopia kartaun eleitorál ka Bille Identidade (BI), Pasaporte ne’ebé validu ne’ebé rejistadu iha fixa família orijinál no kopia.
Prosesu pagamentu subsídiu ne’e, halo direta ba xefe uma kain ka reprezentante sira ho valor $200.00 no pagamentu ne’e sei halo direta hosi funsionáriu MSSI, MAE, Autoridade Munisípiu (AM) no PAAS ne’ebé hola parte iha ekipa pagamentu no pagamentu halo ba benefisiáriu ne’ebé sira-nia identidade aprezenta hosi administrasaun suku ba MAE.
Administradór Munisípiu Covalima, Francisco de Andrade hateten, administradór postu administrativu no lidér komunitáriu nia prezensa ne’e relasiona politika Governu atu halo pagamentu subsídiu désimu terseiru iha fulan novembru ne’e.
“Enkontru ohin oinsa atu prepara ba ita-boot sira tanba fulan novembru atu halo pagamentu subsídiu desimu terseiru ba uma-kain sira, tanba ne’e ohin halibur xefe suku, OPS no administradór postu nune’e bele hatene regra,” nia informa.
Nia mós husu ba administradór postu no xefe suku sira tenke ativu, nune’e bainhira hala’o pagamentu karik lider komunitáriu sira iha ona kuñesementu.
Antes ne’e, Diretór Apoiu Organizasaun Noun Governamentál, Agostinho Mendonça “Ran Nakali” fó sai, iha munisípiu Covalima rejista benefisiáriu ba subsídiu $200 ba uma kain ne’e, hamutuk uma-kain 18,573 no aumenta lista adisionál 1,805.
Jornalista : Celestina Teles
Editór : Cancio Ximenes
