Tinan 2022: SASCAS apoiu membru FONGTIL besik 80

DILI, 28 outubru 2022 (TATOLI)–Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, hateten iha tinan ne’e membru FONGTIL besik 80 mak hetan apoiu hosi Serbisu Apoiu Sosiedade Sívil no Auditória Sosiál (SASCAS).

“Tinan ida-ne’e SASCAS fó apoiu ba ami-nia membru besik 80 ne’ebé halo serbisu iha baze iha munisípiu tomak. Sesaun ida ohin ne’e, atu ajuda ami-nia membru sira kompreende di’ak liután, nune’e bele iha opurtunidade ruma halo aplikasaun ruma iha futuru,” Diretór FONGTIL hateten ba jornalista sira iha marjen atividade sensibilizasaun dekretu-lei SASCAS iha salaun Komisaun Nasionál Eleisaun (CNE, siglá portugés), Dili, sesta ne’e.

Atividade sira-ne’ebé hetan apoiu husi SASCAS nian ba Organizasaun FONGTIL mak atividade komunitária nian mak balun halo grupu agrikultura haki’ak karau, manu, ikan nomós balun ba konstrusaun fasilidade sistema bee-moos no selu-seluk tan.

Diretór Ezekutivu Serbisu Apoiu Sosiedade Sívil no Auditória Sosiál (SASCAS), Edwin Noronha hateten, tinan ne’e, SASCAS apoiu osan $1.700 ba sosiedade sivil sira inklui FONGTIL.

“Tinan ne’e ami iha $1.700 ba apoiu oranizasaun sosiedade sívil no grupu sira no aplikasaun hosi organizasaun sosiedade sívil no grupu ne’ebé haruka ba ne’e 200 liu,” nia dehan.

Sira-nia apoiu bazea ba disponibilidade no kapasidade finanseira ne’ebé sira iha, tanba sira tenke jere fali atu atribui fundu ba sosiedade sivil bazea ba kapasidade no orsamentu disponivel ne’ebé mak iha.

“Iha tinan kotuk, ha’u dehan dokumentu 400 mak iha, mezmu ami konsidera de’it 191 dokumentu tanba bazea ba disponibilidade orsamentu ne’ebé mak tutela ba,” nia dehan.

Nia dehan, apoiu balun ne’ebé sira-nia parte konsege partilla mak apoiu ba Forum Organizasaun Naun Governamentál Timor-Leste (FONGTIL).

“Ami iha klasifikasaun iha forum depois tun fali mai rede sira, depois membru sira tanba ami iha klasifikasaun depois grupu sira,” Edwin hateten.

Apoiu SASCAS nian ba ezekusaun atividade hotu ne’ebé Organizasaun Naun Goveranentál (ONG) sira realiza no atinje ona 50% iha teritóriu nasionál.

“Atualmente kauze orsamentu iha atividade sira-ne’e dehan apoiu organizasaun sosiedade sivíl no grupu sira-ne’e ami atinje ona 50% ba atividade ida-ne’e. Ami tenta tanba ne’e serbisu parseria depende mós ba sira-nia progresu ba sira-nia ezekusaun sira-nia atinjimentu mak determina ami-nia ezekusaun,” Edvin Noronha

Jornalista : Osória Marques

Editór : Cancio Xiemens