Tinan 2023: DNTT sei instala semáforu foun tolu iha kapitál Dili
DILI, 28 outubru 2022 (TATOLI)—Diretór Dirasaun Nasionál Transporte no Terrestre (DNTT), António da Costa, informa tuir planu iha tinan 2023 ne’e DNTT sei instala semáforu foun tolu iha kapitál Dili.
Notísia Relevante: Instalasaun semáforu foun tolu, empreza hein pagamentu inztalaaun 50%
“Iha tinan 2023, ami sei instala semáforu foun iha fatin tolu (3) hanesan iha Polísia Estasaun Becora, rotunda Francisco Xavier Amaral iha Merkadu Lama no Rotunda Nicolau Lobato iha Comoro,” António da Costa hateten ba jornalista sira, iha nia knaar fatin, Díli, sesta ne’e.
Nia esplika, aleinde instala semáforu foun tolu (3) iha 2023, DNTT mós sei monta sinál ba ema ho defisiénsia (EhD) iha fatin lima (5) no sei sei instala parajen (halte) bus hamutuk 64 iha kapitál Dili no sei monta jembatan penyebrangan.
“Programa sira-ne’e mak tama hotu iha planu prioridade ba tinan 2023. Maibé, ba jembatan penyebrangan ne’e hanesan iha sidade boboot sira iha, aleinde ita uza zebra cross. Tanba dala ruma karreta boot sira mai, entaun sira (ema rai-li’ur) halo tiha jembatan penyebrangan ida nune’e ema sa’e hodi liu tun iha sorin,” nia esplika.
Kona-ba DNTT prevee orsamentu hira ba 2023, nia hatán, agora daudaun nia parte seidauk fó sai totál orsamentu hira mak sei tau iha 2023, tanba DNTT sei diskute ho Ministériu Transporte no Komunikasaun (MTK) hafoin deside orsamentu hodi tau ba iha 2023.
Jornalista : Nelia Fernandes
Editór : Cancio Ximenes
