Top

Alin Laek apresia MAE tanba konsidera preokupasaun povu Quelicai

Xefe Ekipa Validasaun Munisípiu Baucau, atuál reprezentante Konsellu Kombatente Libertasaun Nasionál, Baucau iha nasionál, Costodio Belo 'Alin Laek'. Imajen TATOLI/Natalino Belo

DILI, 29 outubru 2022 (TATOLI) — Veteranu Costodio Belo, Alin La’ek, nu’udar Quelicai Oan, apresia tebes ho Ministru Administrasaun Estatal, Miguel Pereira de Carvalho tanba hatudu nia vontade hodi hakbesik no rona opiniaun hotu ne’ebé povu Quelicai hato’o.

“Tanba ne’e ita hatudu rezultadu no vontade ne’ebé di’ak no husu, ita Quelicai oan nian opiniaun, atu ministru fila ba Dili karik lori ba luta iha Konsellu Ministru no Parlamentu Nasionál, atu ita-nia mehi hodi re-ativa postu antigu bele realiza,” Alin Laek dehan iha komunikadu imprensa, ne’ebé Agência Tatoli, asesu ohin.

Asuntu ida-ne’e, Veteranu Alin Laek hateten bainhira MAE, Miguel Pereira de Carvalho ho nia ekipa halo diálogu ho povu suku lima hanesan Suku Afaça, Namanei, Guruça, Waitame no Abafala, iha Sede Suku Afaça, Postu Administrativu Quelicai, Munisípiu Baucau.

Husi Suku lima ne’e, iha hanoin atu reativa hikas postu administrativu Quelicai ho objetivo atu hakbesik liu serbisu administrasaun no
mós dezenvolvimentu ba povu, tanba ho distánsia kilómetru 32 ba postu administrativu Quelicai.

Haree ba situasaun hirak ne’e mak, suku lima hato’o sira-nia difikuldade ne’e ba iha primeiru Governu to’o kuartu Governu ne’ebé la konsege re-ativa, maibé ho prezensa MAE nian bele hato’o no hatudu rezultadu ne’ebé di’ak liuhusi Konsellu Ministru.

Ho preokupasaun no difikuldade hotu ne’ebé povu hato’o, nune’e MAE, Miguel Pereira de Carvalho, husu pergunta dahuluk mak “ita sira populasaun ohin iha ne’e hotu-hotu hakarak ga Lae?

Daruak mak atu sai postu karik sentru hodi instala edifísiu públiku tantu edifísiu postu no fasilidade sira seluk mak iha ne’ebé? Ikus mak se sai postu administrativu karik naran tau saida?

“Ohin ha’u mai para atu rona opiniaun husi populasaun sira hotu nia hanoin no hakarak rona diretamente, atu nune’e ha’u hakarak rona mós resposta tolu ba pergunta. Resposta husi perguntas 3 ne’e mak, ha’u hakarak lori fila,” MAE dehan.

Tamba ne’e mak governante husu populasaun hotu-hotu tenke ativu no ko’alia iha-ne’e.

Tanba objetivu husi polítika devizaun administrativa territóriu mak, atu halo balansu no hakbesik dezenvolvimentu ba iha komunidade sira-ne’ebé seidauk sente dezenvolvimentu no tanba ho devizaun ne’ebé di’ak investimentu finanseira públika aloka ba dezenvolvimentu bele iha ekitativu.

Intelektuál Quelecai oan, Inácio Moreira hato’o apresiasaun ba Ministru Miguel Pereira de Carvalho, no Oitavu Governu tomak tanba prosesu loke postu no munisípiu ne’e, susar tebes, mas iha mandatu governu ne’e bele realiza.

“Ha’u hit xapeu, tanba mandatu Governu ne’e bele hafasil nomós hatudu duni katak iha governu ne’e mak munisípiu Ataúro, Postu Hatolia B no Loré, konsege sai Postu Administrativu iha Mandatu Governu ida ne’e,” nia dehan.

Partisipa iha diálogu ne’e mak Prezidente Autoridade Munisípiu (PAM) Baucau, Diretor Jerál Dezenvolvimentu Rural, Asesora Prinsipál MAE, Veteranu no lian na’in sira, Komandante Polísia Nasionál Timor-Leste (PNTL) Munisípiu Baucau ho ekipa, Amu Pároku, autoridade lokál, lideransa komunitária no komunidade sira husi suku lima Postu Administrativu Quelicai.

Jornalista : Osoria Marques

Editór: Evaristo Soares Martins

Publisidade

Leave a Reply

Latest Post

error: Content is protected !!