OÉ-CUSSE, 29 outubru 2022 (TATOLI) – Autoridade Rejiaun Administrativa Espesiál Oé-Cusse, sábadu ne’e selebra akordu ho xefe suku 18 atu implementa Programa Suku Amasat (suku furak no kapaas) iha suku idak-idak iha territóriu Oé-Cusse.
Selebrasaun akordu ne’e realiza iha otél Ambeno ho valór orsamentu hamutuk rihun $2, nu’udar implementasaun ba faze inísiu ho durasaun fulan-haat, ho objetivu atu dezenvolve suku sai furak, no rezolve problema sosiál sira iha setór infraestrura bázika iha edukasaun, saúde, agrikultura, turizmu komunitária, kultura no meiu-ambiente.
Prezidente Autoridade RAEOA, Arsénio Paixão Bano, informa, selebrasaun akoreu ne’e ho suku 18 ba Programa Suku Amasat, ho nia intensaun atu mobiliza partisipasaun komunidade iha nível suku ba dezenvolvimentu suku amasat ho valór orsamentu hamutuk rihun $2 kada suku.
“Programa foin ba dahuluk implementa ho valór rihun $2, no suku Costa maka rihun $4 hamutuk ho suku preparativu Kutete no Monemeko, iha programa nia laran mós apoiu finansia ba tékniku suku nian, ne’e hatudu atu fó fiar ba suku sira hodi jere rasik fundu ne’e,” Arsénio Paixão Bano, informa liuhosi konferénsia imprensa ne’ebé hala’o iha otél Ambeno Oé-Cusse.
Nune’e autoridade RAEOA espera ho esperiénsia ne’e, sei iha nia kontinuasaun ba programa ne’e rasik, no mós apou ba fundu, nune’e bele dudu dezenvolvimentu suku no rezolve problema sosiál sira-ne’ebé akontese.
“Fundu ida-ne’e sei fokuliu atu dezenvolve setór sira iha suku laran, mai hosi meiu-ambiente, saúde, infraestrutura bázika iha suku, edukasaun, agrikultura, turizmu komunitáriu, kultura, desportu no joven feto no mane,” nia afirma.
Autoridade ne’e fundamenta, implementasaun Programa Suku Amasat, kada tinan dala tolu, ho durasaun fulan haat sei hetan avaliazasaun hosi ekipa organizasaun avaliasaun Programa Suku Amasat nian.
“Iha fulan haat sei suku ida-ne’ebé aprezenta no hadi’a suku sai furak, suku ne’e sei hetan prémiu ba programa dezenvolvimentu ho valór rihun $15, segundu lugár nia prémiu rihun $10 no terseiru lugár hetan prémiu rihun $7,500 no ikusliu maka rihun $5,” nia informa.
Tanba liga ho Programa Suku Amasat, Autoridade RAEOA investe tán iha koñesimentu sei lori xefe suku sira halo estudu komparativu iha Nusa Tenggara Timur (NTT), no mós sei apoiu tékniku iha suku hodi mobiliza tán xeke suku sira atu aumenta tán koñesimentu iha munisipíu seluk.
“Esforsu ida-ne’e halo para dezenvolvimentu iha suku bele la’o ho lais liután, entaun Autoridade nia esperansa xefe suku sira bele rezolve problema ki’ik sira-ne’ebé mak durante ne’e akontese iha suku, la presiza ba to’o diresaun ka membru autoridade sira, tanba fundu ne’e nia objetivu atu rezolve problema iha suku,” nia espera.
Xefe suku Abani hosi sub-rejiaun Pasabe, Gabriel Neka, agradese ba Autoridade RAEOA, no espera ho programa ne’e bele halo kompetisaun entre suku sira atu kontinua esforsu hodi dezenvolve suku rasik.
“Ha’u agradese tebes tanba apoiu ida-ne’e atu fó tan responsabilidade ba ami autoridade lokál atu oinsa dezenvolve suku sai furak, programa ne’e importante tebes tanba ami agora ne’e atu kompete ona, hanesan uluk tempu Indonézia nian lomba desa, entaun setór edukasaun, agrikultura no setor seluk ami tenke halo,” nnia orgullu.
Notísia relevante: Autoridade RAEOA sensibiliza ‘Programa Suku Amasat’ ba autoridade lokál sira
Jornalista: Abílio Elo Nini
Editór: Evaristo Soares Martins
