VIQUEQUE, 29 outubru 2022 (TATOLI)- Xefe suku Dilor, Jacinto Ximenes, hatete governu distribui ona jeradór ba suku maibé presiza hasa’e osan operasionál suku hodi halo manutensaun no sosa kombustível ba jeradór hodi halo atendimentu komunidade sira.
“Ha’u sente governu distribui ona jeradór ba ami-nia suku di’ak ona, maibé ba oin ne’e ami sei hasoru difikuldade ba manutensaun no kombustível. Sé bele governu hasa’e osan operasionál suku nian hodi ami bele sosa mina no halo manutensaun,” Xefe suku Dilor hateten ba Tatoli, iha suku Dilór, postu adiministrativu Lacluta, sábadu ne’e.
Nia husu Ministériu Adiministrasaun Estatal (MAE) hosi hasa’e osan operasionál suku nian hodi halo manutensaun ba jeradór no sosa mina ba jeradór fó atendimentu ba komunidade Dilor.
“Tanba ne’e ha’u hakarak husu ba MAE se bele hasa’e osan ida operasionál suku nian hodi ami bele halo manutensaun ba jeradór no sosa mina ba jeradór hodi halo atendimentu loron loron ba ita-nia komunidade suku ida-ne’e,” nia fó hanoin ba Governu.
Nia dehan, foin lalais entre loos de’it jeradór maib kombustivel laiha, ida-ne’e sei difikulta nafatin ba suku tanba kombustível laiha entaun labele halo atendimentu ba komunidade sira.
“Maske ita iha ona fasilidade hanesan komputadór no printer, agora apoia tán jeradór ne’e di’ak. Maibé mina mak laiha ita nafatin labele halo atendimentu ba ita-nia komunidade sira. Karik ha’u-nia hanoin sira-ne’e Governu tau ba konsiderasaun”, nia realsa.
Tuir dadus abitante hosi suku Dilor totál hamutuk 3.245 no totál aldeia hamutuk lima.
Enkuantu iha munisípiu Viqueque suku 10 simu ona jeradór hosi governu liuhosi Ministériu Administrasaun Estatal humutuk unidade 10 ne’ebé distribui ba suku sira seidauk asesu enérjia elétrika.
Jornalista :Vitorino Lopes da Costa
Editór : Evaristo Soares Martins
