Programa Ai ba Futuru realiza expo movel iha Viqueque
VIQUEQUE, 29 outubru 2022 (TATOLI)- Programa Ai ba futuru realiza expozisaun movel hodi aprezenta rezultadu serbisu iha munisípiu Viqueque
Ho tema ba expo ne’e “Ita-boot iha Viqueque, Mai hamutuk ho ami atu hatene klean liután kona-bá Ai ba Futuru”.
Koordenadór projetu Ai ba Futuru, Nogera Soares, hateten expozisaun ida-ne’e objetivu fó-sai rezultadu serbisu ne’ebé Ai ba futuru durante ne’e realiza iha munisípiu Viqueque.
“Expo ida-ne’e ami realiza ho objetivu atu aprezenta rezultadu serbisu ne’ebé implementa iha suku tarjetu sia iha Viqueque. Nune’e autoridade lokál sira bele hatene agro-floresta nian ne’ebé implementa iha munisípiu Viqueque,” Koordenadór projetu Ai ba Futuru, hateten ba jornalista Agência Tatoli, iha salaun parókia Viqueque, sábadu ne’e.
Koordenadór projetu Ai ba Futuru ne’e hatutan, programa Ai ba Futuru finansia hosi Uniaun Europeia no Governu Alimaña implementa programa Ai ba futuru hosi GIZ ne’ebé serbisu hamutuk Ministériu Agrikultura no Peska (MAP) tarjetu ba implementasaun projetu Ai ba Futuru munisípiu haat maka hanesan Manatuto, Baucau, Lautém no Viqueque.
“Iha munisípiu Viqueque ita implementa hosi suku Ualu. Progresu implementa durante ne’e ha’u haree benifisiáriu komesa muda sira-nia mentidade oinsá adota sistema agro flosta ne’ebé inovativu ne’ebé garantia ba sira-nia produsaun agrikultura sai sustentablidade iha futuru no kria oportunidade ba komunidade sira tanba programa Ai ba futuru implementa komunidade sira hetan formasaun lubuk ida kona-ba establese viveru, oinsá buka konsumidór sira sosa”, nia relata.
Nia dehan, projetu Ai ba futuru implementa implementa ona tinan lima sei ramata iha tinan ida ne’e. Espera ba oin MAP sei tau ba perioridade programa Agro floresta iha Viqueque.
“Ha’u espera ba oin MAP bele kontinua programa agro floresta ida-ne’e. Ha’u sujere benefisiáriu sira bele kontinua implementa programa ida-ne’e,” nia katak.
Durante ne’e grupu sira kuda modo hakiak animál iha suku tarjetu sira ne’ebé iha munisípiu Viqueque.
Enkuantu expozisaun ne’e aprezenta rezultadu serbisu ne’ebé selesionadu husi projetu Ai ba Futuru durante implementasaun iha tinan lima nia laran dezde tinan 2017 to’o 2022 iha munisípiu parte leste hanesan Manatuto, Baucau, Viqueque ho Lautém.
Iha expo ne’e partisipa hosi embaixadór Uniaun Europeia iha Timor Leste, Marc Fiedrich, asesór Prinsipal Ai ba Futuru ho Koordenador GIZ iha Timor-Leste, agrikultór sira husi Ai ba Futuru iha Viqueque no mós reprezentante diretór sira, xefe departamentu no administradór postu sira.
Jornalista : Vitorino Lopes da Costa
Editór : Evaristo Soares Martins
