CNA realiza ona konkursu aprovizionamentu ba projetu 237 ho kustu billiaun $1,1
DILI, 30 outubru 2022 (TATOLI)- Ministériu Finansa (MF) liuhosi Komisaun Nasionál Aprovizionamentu (CNA, sigla Portugés), hahú husi fulan-janeiru, tinan 2021 to’o iha outubru 2022, realiza ona konkursu aprovizionamentu ba projetu sira hamutuk 237 ho totál kustu estimativa billiaun $1,1.
“Iha tinan 2021, CNA loke konkursu aprovizionamentu ba projetu hamutuk 117 ho kustu estimativa millaun $483. Tinan ida-ne’e, númeru konkursu projetu sa’e ba 120 ho kustu estimativa millaun $626. Totál projetu durante tinan rua ikus ne’e hamutuk 237 ho kustu estimativa billiaun $1,1,” Ministru Finansa, Rui Augusto Gomes, hateten liuhosi nota imprensa ne’ebé Agência Tatoli simu, iha domingo ne’e.
Forte finansiamentu orsamentu ba projetu pakote 237 ne’e mai husi fonte tolu: Fundu Infraestrutura, Fundu La’ós-Infraestrutura, no Empréstimu husi Banku Dezenvolvementu Aziátiku (ADB, sigla Inglés) no Banku Mundiál.
Governante ne’e hatutan katak públiku hakarak atu haree melloramentu iha Sistema aprovizionamentu Timor-Leste nian. Tanba ne’e iha inísiu 2020, Governu hato’o pedidu ba Banku Mundiál no ADB atu fó asisténsia tékniku hodi halo avaliasaun kona-ba Sistema Aprovizionamentu iha Timor-Leste.
Avaliasaun Metodolojia ba Avaliasaun Sistema Aprovizionamentu (MAPS, sigla inglês), mai iha tempu oportunu tanba deskobrementu sira ne’e ajuda informa Governu hodi bele reforsa liután Dekretu Lei númeru 22/2022, 11 Maiu kona-ba Rejime Jurídiku Aprovizionamentu, Kontratu Públiku ho nia Infrasaun sira.
Dekretu Lei ne’ebé aprezenta husi Ministru Finansa, Rui Gomes no hetan ona promulgasaun husi Prezidente Repúblika Francisco Guterres Lu-Olo iha fulan-maiu liubá, simplifika prosedimentu aprovizionamentu husi tipu prosedimentu hitu ba tolu de’it no sei troka rejime jurídiku atuál tolu ne’ebé aprova iha 2005 no iha ona vijénsia durante tinan 17 nia laran: Rejime Jurídiku Aprovizionamentu; Rejime Jurídiku Kontratu Públiku; no Infrasaun Administrativa sira.
Diploma Foun ne’e sei integra Rejime Jurídiku atuál tolu ba iha úniku rejime jurídiku ida de’it no sei hahú vigora hahú iha 1 Janeiru 2023.
Tinan kotuk, Gabinete Polítika Reforma & Kapasitasaun Jestaun Finansa Públika no Gabinete Apoiu Jurídiku Ministériu Finansa, serbisu hamutuk ho ekipa MAPS organiza ona konsultasaun no diskusaun virtuál lubun ida ho reprezentante husi Liña Ministériu relevante, Ajénsia no Instituisaun Estadu, Sosiedade Sivíl, Setór Privadu hodi halo avaliasaun kona-ba Sistema Aprovizionamentu Públiku Timor-Leste uza Metodolojia MAPS.
Objetivu dezenvolve MAPS mak: apoiu Governu mellora dezempeñu sistema aprovizionamentu públiku hodi fó rezultadu di’ak ba uzu fundus públiku; Atu informa Governu kona-ba dezempeñu atuál, dezafius no oportunidade ba melloramentu; Atu dezenvolve planu asaun estratéjiku ida hodi mellora efikásia; no Atu ajuda Governu alkanse Objetivus Dezenvolvimentu Sustentavel.
Jornalista : Antónia Gusmão
Editór : Florencio Miranda Ximenes
