BAUCAU, 31 outubru 2022 (TATOLI) – Komandu Polísia Nasionál Timor-Leste (PNTL) Munisípiu Baucau hamutuk ho FALINTIL-Forsa Defeza Timor-Leste (F-FDTL) Komponente terrestre hala’o operasaun konjunta hodi asegura seguransa hakmatek iha loron matebian.
Komamdante PNTL Baucau, Superintendente Xefe António de Sá direitamente fó instrusaun ba membru seguransa hosi parte rua atu fó seguransa iha amibiente pás no hakmatek ba komuinidade inklui pasa revista ba transporte públiku ne’ebé halo movimentu hosi kapitál Dili.
“Ita alerta ba komuinidade atu selebra loron matebian ho hakmatek no utiliza direitu sirkulasaun durante 24 oras, hanesan órgaun seguransa prontu atu asegura kualkér movimentu komuinidade sira,” Komamdante PNTL Baucau hateten iha Vila Nova, segunda ne’e.
Objetivu operasaun ne’e nu’udar ezekuta diretiva hosi komandu jerál PNTL kona-ba ámbitu komemorasaun loron finadu ne’ebé kada tinan selebra iha loron 2 novembru.
“Atividade mak halao operasaun konjunta, pasa revista iha terrenu, liuliu ba movimentasaun transporte hodi evita dezastre,” Superintendente Xefe António de Sá akresenta.
PNTL Baucau identifika ona área risku konflitu hodi desktaka pesoál PNTL atu fó seguransa ba simtéiru sira liuliu iha suku Uaiili, Gariuai no Bibidala, Tirilolo Baucau vila.
Nune’e, António de Sá husu ba komunidade Baucau liuliu juventude sira atu kolabora ho parte seguransa nune’e selebrasaun loron matebian iha ambiente pás no hakmatek.
PNTL Baucau rejista no prosesa kazu asistente hamutuk rua hanesan iha área postu Vemasse no suku Mulia ne’ebé rezulta vítima na’in-rua lakon vida iha loron 30 no 29 fulan outubru.
Hola parte iha formatura no operasaun konjunta refere kompostu hosi komandante eskuadra PNTL postu admistrativu neen, komamdante polísia militár Baucau, segundu komandante komponente terrestre no membru PNTL no F-FDTL.
Jornalista : Natalino Belo
Editór : Evaristo Soares Martins
