iklan

NASIONÁL, HEADLINE, POLÍTIKA

PM kongratula Prezidente eleitu Brazil Luiz Inácio Lula

PM kongratula Prezidente eleitu Brazil Luiz Inácio Lula

Prezidente eleitu Brazil, Luiz Inácio Lula da Silva. Imajen/Wikimedia

DILI, 01 novembru 2022 (TATOLI)-Primeiru-Ministru (PM), Taur Matan Ruak, kongratula Prezidente eleitu Brazil ba dala-39, Luiz Inácio Lula da Silva, ne’ebé antes ne’e hanesan Prezidente ba dala-35 ba nasaun Brazil iha períodu 2003 to’o 2010.

“Hanesan Primeiru-Ministru, hodi VIII Governu Timor-Leste no ha’u-nia naran rasik hakarak hato’o ha’u-nia votu felisitasaun ba Señor Luiz Inácio Lula da Silva ne’ebé mak eleitu hikas demokrátikamente hosi povu atu lidera Brazil ba períodu tinan haat oin mai,” PM hato’o mensajen ne’e  liuhosi nota ne’ebé Agência Tatoli asesu, segunda ne’e.

Notísia relevante: Governu Brazil kontribui $120.000 ba Timor-Leste tulun vítima dezastre naturál

Xefe Governu dezeju susesu ba lideransa Lula nian no hein katak sei lori povu Brazil hetan susesu boot liután.

“Timor-Leste hein katak ho lideransa Prezidente Lula nian bele promove no hametin liután lasu amizade no relasaun ne’ebé ita kesi metin ona durante ne’e. La haluha ha’u-nia hakoak boot ba Señor Prezidente sesante Jail Bolsonaro ne’ebé durante nia mandatu kontribui ona ba páz iha rejionál no mundiál, liuliu ba hametin lasu amizade entre Timor-Leste ho Brazil. Hein katak ita-boot nia espíritu lideransa sei sai nu’udar ezemplu ba lideransa foun sira atu banati tuir,” nia dezeja.

Aleinde ne’e, Xefe Ezekutivu apresia ba prosesu eleitorál iha Repúblika Federativa Brazil ne’ebé demokrátiku tebes, hanesan vitória boot ba povu Brazil la’ós de’it tanba sira hetan líder foun, maibé hatudu katak Brazil nu’udar paíz ne’ebé valoriza sistema demokratizasaun.

“Parabéns Prezidente Lula! parabéns povu brazileiru,” nia subliña.

Luiz Inácio Lula da Silva eleitu nu’udar Prezidente Brazil ho votu 60.345.999 (50,9%), enkuantu kandidatu Prezidente, Jair Bolsonaro, ho votu 58.206.354 (49,1%), ho votu inválidu/nulu 5.700.443.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!