iklan

INTERNASIONÁL, DILI, HEADLINE, POLÍTIKA

Portugál-TL serbisu hamutuk kria kondisaun ba timoroan sira iha Lisboa

Portugál-TL serbisu hamutuk kria kondisaun ba timoroan sira iha Lisboa

Prezidente Repúblika (PR), José Ramos Horta, segunda ne'e (31/10/2022), hasoru malu ho Prezidente Repúblika Portugál, Marcelo Rebelo de Sousa, iha Palásiu Belem, Lisboa hodi diskute kooperasaun entre nasaun rua no situasaun timoroan sira iha Lisboa, segunda (31 outubru 2022). Imajen/Mídia PR.

DILI, 01 novembru 2022 (TATOLI)—Prezidente Repúblika (PR), José Ramos Horta, segunda ne’e (31/10/2022), hasoru malu ho Prezidente Repúblika Portugál, Marcelo Rebelo de Sousa, iha Palásiu Belem, Lisboa hodi diskute kooperasaun entre nasaun rua hodi kria kondisaun ba timoroan sira iha Lisboa.

Notísia Relevante: Prezidente Repúblika to’o ona Portugál

Xefe Estadu na’in rua promete atu kria kondisaun ba timoroan sira-ne’ebé foin to’o iha Portugál no kombate ilegalidade , estrutura ilísita, explorasaun, tráfiku, mão-de-obra no prosesu oioin mak tama ona iha Ministériu Públiku nomós iha ona inspeksaun laborál iha empreza sira, kontratasaun no kondisaun serbisu no saláriu.

“Ita iha medida konjunta, autoridade hosi nasaun rua, dezde fenómenu ne’e aumenta hosi agostu, setembru. Iha atuasaun iha nível oioin, ita iha akordu, no buat ne’ebé intolerável mak saida mak akontese no saida mak atu mai. Nune’e tenke fiskaliza, objetu intervensaun, la’ós de’it administrativa maibé foti justisa,”  Prezidente Portugál Marcelo Rebelo de Sousa, hateten liuhosi komunikadu imprensa ne’ebé Agéncia TATOLI asesu hosi mídia Palásiu Prezidensiál, tersa ne’e.

Tuir Marcelo Rebelo, lokaliza ona timoroan na’in 873 ne’ebé moris mukit loos no dadaun ne’e sira hela iha instituisaun akollamentu, autarkia lokál no instituisaun solidariedade sosiál.

Prezidente Repúblika, José Ramos Horta, hateten nasaun determinadu hodi identifika no kastigu grupu ne’ebé mak bosok joven sira hodi ba serbisu iha Portugál no nasaun seluk.

“Fenómenu ida ne’e komún liu iha mundu, liu-liu iha nasaun sira-ne’ebé iha vias ba dezenvolvimentu, dékada barak ona, Timor-Leste hanesan Estadu livre no demokrátiku, laiha problema ho ema tama sai ba timoroan no ema seluk. Fasil liu ba ema atu faan hanoin iluzaun hodi serbisu iha Portugál, Alemaña, Canadá ne’ebé mak iha moris di’ak,” Horta hateten.

Horta destaka joven sira-ne’ebé serbisu iha Korea Súl no Austrália ne’ebé hetan vensimentu di’ak.

“Ita iha programa ba joven sira atu ba Korea Súl ho joven 2000-resin, vantajen ida sei kontinua, ida-ne’e hanesan prosesu aprendizajen kona-ba ba profisiaun foun, abitu no dixiplina, sira-ne’e mak embaixadór boa vontade,” nia dehan.

Hanesan mós ba Austrália iha programa sazionál ne’ebé hahú tiha ona tinan lima, tinan neen, ne’e programa modestu liu, Austrália la iha esperiénsia ba situasaun nune’e ba timoroan sira no programa ida-ne’e mós la’ós fasil, agora la’o di’ak ona ho mekanizmu Estadu.

Mai iha Portugál ne’e situasaun oin seluk, tanba kumpre prosesu burokrátiku hosi Timor no nasaun ne’ebé simu joven sira.

Tuir Xefe Estadu, obrigasaun hosi Timor-Leste mak identifika no kastigu tuir lei, grupu ne’ebé bosok timoroan sira, kobra joven sira ho osan $3.000 to’o $5.000.

Antes hala’o enkontru bilaterál entre xefe Estadu rua, PR Horta akompaña hosi ekipa hala’o uluk vizita no presta omenajen no tau aifunan ba Tumblo Camoes no iha tempu hanesan asina mós livru onra iha Praça do Império Belem-Portugál.

Hafoin ida ne’e, PR Horta akompaña hosi Guarda Nasionál Republikanu (GNR) sai hosi edifísu Praça do Império ba Palácio Prezidensial, Prezidente Repúblika simu ho onra militár ho kavalaria GNR hodi akonpaña viajen ba Palásiu Belem.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!