Autoridade Covalima nomea kargu diretór ensinu sekundáriu foun na’in-haat
COVALIMA, 04 novembru 2022 (TATOLI)–Autoridade munisípiu Covaalima liuhosi Servisu Edukasaun, sesta ne’e, nomea kargu diretór eskola sekundáriu jeral no tékniku vokasionál foun na’in-haat iha Covalima.
Autoridade Covalima nomea kargu diretór foun bazea ba desizaun hosi Komisaun Funsaun Públika (KFP) númeru 5085/2022/CFP tuir dekretu-lei númeru 7/2009, 15 juñu, Compete á Comissão Funsaun Pública realizar os recrutamento ,nomeações e promoções e setór publico, dekretu-lei númeru 33/2022, 3 agostu, kona-ba Rejime Júridiku Administrasaun no Jestaun ensinu sekundáriu.
Administradór Munisipiu Covalima, Francisco de Andrade, husu ba diretór foun sira-ne’ebé simu kargu diretór tenke ho responsabilidade nune’e ba futuru bele lori eskola ne’e ba oin.
“Ha’u husu ba ita-boot sira responsabilidade ne’e importante tanba ne’e aplika no implementaa matenek ne’ebé ita-boot sira iha atu nune’e eskola ne’e bele ba oin,” Francisco de Andrade hato’o liuhosi nia diskursu, iha Salaun Edukasaun Covalima, Santa Rosa.
Autoridade ne’e mós dehan ba diretór eskola ho adjuntu no xefe gabinete sira-ne’ebé simu ona kna’ar atu hadi’a eskola maibé tenke servisu hamutuk no fiar malu, nune’e munisípiu Covalima bele kompete ho munisípiu sira seluk.
Diretora Escola Téknika Vokasionáal Zumalai, Filomena Barreto, hateten kna’ar ne’ebé nia asume hanesan responsablidade, tanba ne’e sei halo planu nune’e halo mudansa iha eskola tékniku refere.
“Ohin loron, ha’u simu kna’ar hanesan Diretora iha ESTV Zumalai ne’e la’ós oportunidade maibé hanesan responsabilidade boot ida mai ha’u oinsá lori ESTV Zumalai sai di’ak iha futuru. Ha’u iha ona planu oinsá atu dezenvolve ami-nia eskola,” nia dehan.
Diretór foun na’in-haat ne’e ne’e mak Diretúr Eskola Sekundária Jerál Públika de Suai (ESGP-sigla Portugés) Francelino Freitas Carvalho, Diretóra Eskola Téknika Vokasionál Zumalai Filomena Barreto, Diretór Eskola Téknika Vokasionál Fohorem Raimundo Amarál no Diretór Téknika Vokasional Akar-Laran Vidal de Jesus Moniz
Jornalista : Celestina Teles
Editór : Cancio Ximenes
