iklan

COVALIMA, INKLUZAUN SOSIÁL

MAE estabelese pontu fokál Igualidade Jéneru Disabilidade Inkluzaun Sosiál iha Covalima

MAE estabelese pontu fokál Igualidade Jéneru Disabilidade Inkluzaun Sosiál iha Covalima

COVALIMA, 04 novembru 2022 (TATOLI)–Ministériu Administrasaun Estatal (MAE) estabelese Igualidade Jéneru Disabilidade Inkluzaun Sosiál (IGDIS, sigla portugés) hodi apoiu servisu ba dirijente sira iha administrasaun Covalima.

“Atividade ohin ita halo enkontru koordenasaun hodi estabelese pontu fokál  Igualidade Jéneru Disabilidade Inklusaun Sosiál ne’ebé sira hetan ona nomeasaun hosi administradór munisípiu Covalima, hanesan pontu fokál IGDIS hodi fó apoiu servisu iha administrasaun munisípiu,”  Diretora Nasional Planiamentu no Avaliasaun  MAE , Olavia Marques, hateten ba jornalista sira iha salaun AMC, Sukaer Laran, sesta ne’e.

Objetivu estabelese pontu fokál ne’e atu fó apoiu dirijente administradór munisípiu planu no progama atividade ne’ebé mak implementa iha Covalima sensivél ba asuntu Igualidade Jéneru Disabilidade Inkluzaun Sosiál nian.

“Ita ko’alia kona-ba rekrutamentu sira, ita tenke konsidera feto sira hotu iha ne’eba, informasaun sira atu promove feto sira-nia kuiñesimentu nune’e fó tempu ba sira bele asume kna’ar ruma nune’e sira prontu atu lidera,” nia dehan.

Iha enkontru ne’e feto ne’ebé mak asume kargu diretora na’in-ida no feto asume kargu xefe departamentu na’in-tolu, entaun feto nia partisipasaun hodi asume kargu públiku ne’e mínimu tebes iha Covalima

Tanba ne’e, ho estabelesementu pontu fokál Igualidade Jéneru Disabilidade Inkluzaun Sosiál ne’e bele fó hanoin ona ba dirijente sira atu konsidera feto sira-nia partisipasaun iha kualker atividade, nune’e bele promove feto sira atu partisipa iha prosesu dezenvolvimentu.

“Iha enkontru Ohin ita aprezenta matéria sira hanesan kna’ar no responsabilidade pontu fokál Igualidade Jéneru Disabilidade Inkluzaun Sosiál iha sira-nia mandatu durante tinan rua resin no planu asaun anuál ba servisu pontu vokál refere,” nia informa.

Administradór munisipiu Covalima, Francisco de Andrade, rekuiñese feto sira menus asume kargu iha nivél foti desizaun tanba feto sira seidauk prontu atu lidera iha munisípiu Covalima.

“Diretora nia preokupasaun ohin loos duni. Iha Covalima, ita atu fó direitu tuir konstituisaun RDTL mínimu liu foin lalais asume kargu diretora atu foti desizaun atu hateten loloos feto Covalima ne’e, dala ruma fó sala ba feto sira. Ha’u halo proposta atu nomea feto sira no feto sira dehan ha’u sei labele ne’e realiadede kuaze feto na’in hira hasoru ha’u sei labele,” nia hateten.

Jornalista : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!