iklan

DILI, POLÍTIKA

PN-Governu sei debate proposta-lei OJE 2023 iha semana oin

PN-Governu sei debate proposta-lei OJE 2023 iha semana oin

Sesaun plenária Parlamentu Nasionál. Imajen/TATOLI

DILI, 04 novembru 2022 (TATOLI)—Sekretáriu Jerál Parlamentu Nasionál, Adelino Afonso de Jesus, informa PN ho Governu sei hahú halo debate ba proposta-lei Orsamentu Jerál Estadu (OJE) 2023 iha faze jeneralidade tuir kalendáriu iha loron 07 novembru, semana oin.

“Komesa 07 novembru diskusaun jeneralidade ba OJE 2023 durante loron tolu. Purtantu, ita prevee to’o iha loron 21 novembru bele iha aprovasaun finál globál ona,” Sekretáriu Jerál PN hateten ba jornalista sira iha nia kna’ar fatin PN, sesta ne’e.

Kona-ba preparasaun téknika PN nian ba iha debate ne’e, nia dehan, preparadu ba serbisu apoiu plenáriu no debate ne’e fó asesu ba mídia atu halo koobertura.

Antes ne’e, iha loron 03 outubru 2022, Governu liuhosi Ministéiru Finansa (MF), aprezenta ona Proposta-Lei Orsamentu Jerál Estadu (OJE) 2023 ho montante $3.155.715.306 ba Parlamentu Nasionál (PN).

Iha aprezentasaun proposta-lei OJE ne’e aprezenta hosi Ministru Finansa, Rui Agusto Gomes, akompaña Vise Ministru MF, António Freitas no Ministru Asuntu Parlamentár no Komunikasaun Sosiál (MAPKOMS), Francisco Jerónimo, ne’ebé simu direta hosi Prezidente Parlamentu Nasionál, Aniceto Longuinhos Guterres Lopes.

Antes ne’e Prezidente Parlamentu Nasionál, Aniceto Longunhos Guterres Lopes, hateten Governu kumpre ona nia obrigasaun tuir lei Enkuadramentu Orsamentu nian hodi aprezenta proposta-lei OJE ne’e.

“Iha 01 outubru, Governu aprezenta ona proposta lei OJE mai PN maibé monu iha  loron sábadu la’ós dias úteis, nune’e tuir regra jerál kuandu prazu monu iha hahú iha dia útil tuir mai mak ohin segunda-feira. Purtantu, Governu kumpre ona ninia obrigasaun tuir lei haruka submete orsamentu tuir prazu,” Prezidente Parlamentu Nasionál hato’o liuhosi konferénsia imprensa ba jornalista iha sala konferénsia PN hafoin simu proposta lei OJE 2023.

Aniceto Guterres hatutan, iha lei define mós loron 45 hafoin submisaun proposta-lei OJE hosi Governu mai iha PN.

”Loron ne’ebé PN simu komesa dentru loron 45, PN tenke iha ona desizaun aprova ka rezeita, ohin simu ona submisaun proposta lei OJE 2023 ninian nia prosesu sei la’o tuir tramitasaun rejimentál ba iha komisaun C trata asuntu Finansa Públiku no komisaun espesializada atu apresiasaun no relatóriu paresér,” nia hateten.

Iha ona kalendáriu globál PN nian, nia dehan, reuniaun plenária tersa (04 outubru 2022)  meza PN baixa ba komisaun C, audiénsia públika no debate iha plenária PN diskusaun no aprovasaun tantu jeneralidade, espesialidade sei hahú iha 07 novembru  2022, no 18 novembru aprova finál globál no iha 22 novembru envia ba Prezidente Repúblika hodi halo promulgasaun tuir kompeténsia ne’ebé iha, nune’e PN halo esforsu tomak hodi kumpre prazu previstu.

Ministru Finansa (MF), Rui Agosto Gomes, hateten dokumentasaun orsamentál ne’ebé Governu aprezenta ba PN mak hanesan relatóriu orsamentál, dezenvolvimentu orsamentál, elementu informativu ho anexu lubun ida kona-ba fundu mina-rai, fundu kapitál dezenvolvimentu umanu, fundu infraestrutura, dezenvolvimentu munisípiu sira, orsamentu ba sidadaun, orsamentu kontribuisaun parseiru, informasaun Grande Opsaun Planu no mós markadór sira, informasaun seguransa sosiál, RAEOA.

Nia dehan, proposta hosi Governu bazea Lei Grande Opsaun Planu (GOP) tetu ne’ebé deside tiha ona billaun $3.155.715.306.

Enkuantu, despeza globál nian $3.156.922.141 no despeza Setór Públiku Administrativu $3.155.715.306, inklui Fundu Kombatente Libertasaun Nasionál no orsamentu Seguransa Sosiál no Rejiaun Administrativa Espesiál Oé-Cusse Ambeno (RAEOA).

Despeza ba serbisu no entidade Administrasaun Sentrál ho valór biliaun $2,8, despeza sira ne’ebé prevee ba Seguransa Sosiál ho valór millaun $235,7 no RAEOA ho montante millaun $120.

Sei la inklui orsamentu ne’ebé prevee ba Fundu Kombatente Libertasaun Nasionál, alokasaun ba kuadru instituisionál 33%, kapitál sosiál 35%, dezenvolvimentu infraestrutura 18%, dezenvolvimentu ekonómiku no fundu kontinjénsia 3%.

Orsamentu ne’e sei  uza hodi finansia programa 45 liuhosi atividade prinsipál 275, organizadu iha área estratéjiku 16 ne’ebé Governu sei foku ba iha tinan oin hanesan agrikultura, pekuária, peska no floresta, ekonómia no empregu, turizmu, dezenvolvimentu rurál no abitasaun, ambiente, petróliu no minerál, eletrisidade no enerjia renovável, konetividade nasionál, bee no saneamentu, edukasaun no formasaun, saúde, inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasona internasionál no polítika esterna.

Enkuantu, proposta-lei OJE 2023 ne’e komisaun espesializada permanente iha PN ne’ebé trata área temátika ida-idak iha fulan kotuk hala’o ona audiénsia públika durante semana rua ho liña ministériu no entidade Estadu sira, no komisaun espesializada ho komisaun C trata asuntu Finansa Públika halo ona relatóriu paresér  enkamiña ona ba iha meza PN hodi kontinua diskusaun plenária iha faze jeneralidade.

Notísia Relebante: Governu introdús medida 22 iha proposta OJE 2023

Jornalista : Nelson de Sousa

Editór       : Cancio Ximenes  

iklan
iklan

Leave a Reply

iklan
error: Content is protected !!