iklan

DILI, POLÍTIKA

PR Horta aprezenta prespetiva hametin dame iha semináriu internasionál g7+

PR Horta aprezenta prespetiva hametin dame iha semináriu internasionál g7+

Prezidente Repúblika (PR), José Ramos Horta, partisipa iha semináriu ho tema “Meza Redonda a Nova Orden Mundiál” ne’ebé organiza direta hosi Sekretariadu Permanente G7+ iha Lisboa. Imajen/Mídia PR.

DILI, 03 novembru 2022 (TATOLI)—Prezidente Repúblika (PR), José Ramos Horta, partisipa iha semináriu internasionál ho tema “Meza Redonda a Nova Orden Mundiál” ne’ebé organiza direta hosi Sekretariadu Permanente g7+ iha Lisboa.

Tuir komunikadu imprensa ne’ebé Agéncia Tatoli asesu, sesta ne’e, haktuir katak Xefe Estadu nu’udar oradór prinsipál aprezenta prespetiva kona-ba serbisu hamutuk, kontribui hametin dame no luta ba prosesu dezenvolvimentu, hodi hasai povu hosi konflitu, nune’e bele hakat ba prosesu dezenvolvimentu.

Semináriu ho tema “Meza Redonda a Nova Orden Mundiál” refleta ba konjuntura polítika mundiál no kontribui ba halo reflesaun kona-ba realidade hodi halo mudansa.

Laureadu Prémiu Nobel da Paz husu ba nasaun membru Organizasaun Nasaun Unida (ONU) no organizasaun importante sira, atu kontinua hamutuk hodi husu ba Rúsia hodi hapara funu hasoru Úkrania hodi labele fó impaktu ba estabilidade ekonómika mundiál.

Prezidente Repúblika mós fahe esperiénsia kona-ba luta ba ukun rasik an durante tinan 24 nia laran no perkursu istóriku ne’e sai ezemplu ba mundu, hodi harii dame entre nasaun no povu liuhosi prosesu rekonsialiasaun.

Xefe Estadu hanesan ema kuiñesidu iha lobby ba pás no iha influénsia makaas iha ONU, inspiradór iha domíniu rekonsiliasaun, husu atu fahe esperiénsia no prespetiva kona-ba “Rumo a Nova Ordem Mundial”, hodi harii estadu reziliente no foka ba dezenvolvimentu.

Prezidente Horta mós agradese prezensa hosi ninia ómologu Marcelo Rebelo de Sousa iha Simeira Altu nível kona-ba prevensaun konflitu iha mundu multipolár, hanesan prespetiva ne’ebé Organizasaun g7+ organiza iha final Reuniaun Asembleia Jerál ONU ba dala-70 ne’ebé organiza iha loron 23 setembru tinan ne’e iha Nova Iorke.

Nia mós refere ba relatatóriu hosi OCDE tinan 2022 ne’ebé klasifika nasaun 60 hanesan frájil, no hosi númeru ne’e nasaun 15 mak frálil liu no sia (9) hosi ida-ne’e mak forma Grupu g7+ hamutuk ho nasaun 15 sira seluk.

Preokupasaun seluk ne’ebé Xefe Estadu, Ramos Horta aprezenta mak hamlaha alarmante iha Repúblika Sentru Áfrikana, Chade, Congo, Madagaskar no Iemen no provizoriamente alarmante liu mak iha Burundi, Somália, Sudaun Súl no Síria.

“Dadus kona-ba seguransa alimentár no nutrisionál iha mundu iha tinan 2022 hatudu katak, iha tinan 2021 númeru ema-ne’ebé mak sofre nutrisaun krónika aumenta ba millaun 825. Impaktu ida-ne’e, akontese iha Áfrika, Súl Saara, Súl Ázia, Amérika Sentrál no mós súl no seluk tan,” Xefe Estadu hateten.

Sekretariu Jerál g7+, Helder da Costa, ne’ebé reprezenta Pesoa Eminiente g7+, Kay Rala Xanana Gusmão agradese Prezidente Ramos Horta ne’ebé fahe matenek hodi fanu mundu tomak hodi luta ba dame.

“Relevansia hosi tema ne’e bele kontribui ba halo reflesaun kona-ba realidade, ne’ebé sai hanesan palku ba ita-nia esperansa, ne’ebé mak bele promove mudansa ba realidade di’ak ka pelumenus promove mudansa hodi hadiak realidade ida-ne’e,” Helder da Costa hateten.

Semináriu ne’e partisipa mós hosi delegasaun nasaun membru organizasaun g7+, delegasaun hosi Finlandia, Indonézia no Austrália no parseiru observadór internasionál.

Nasaun frájil hirak ne’ebé halibur no sai membru iha g7+ hamutuk na’in-19, kompostu hosi Timor-Leste, Afganistaun, Brundi, Costa du Marfim, Etiopia, Guiné, Guiné-Bissau, Haiti, Illas Salomon, Libéria, Nepal, Papua Nova Guiné, Republika Centrafricaina, Republika Demokratika Congo, Serra Leone, Somália, Sud-Soudan, Tchad, ho Togo. 

Jornalista : Nelson de Sousa

Editór        : Cancio Ximenes 

iklan
iklan

Leave a Reply

iklan
error: Content is protected !!