DILI, 04 novembru 2022 (TATOLI)—Prezidente Repúblika (PR), José Ramos Horta, hala’o enkontru ho emprezáriu portugés sira-ne’ebé hamahan aan iha Konfederasaun Emprezária atu loke investimentu oioin iha Timor-Leste.
Tuir komunikadu imprensa ne’ebé Agéncia Tatoli asesu, sesta ne’e, haktuir Xefe Estadu garante kondisaun ba investimentu internasionál hanesan seguransa no polítika Timor-Leste ba setór privadu portugués sira no husu atu labele laran taridu hodi halo investimentu, tanba Timor-Leste seguru liu kompara ho nasaun sira seluk ne’ebé mosu beibeik konflitu.
PR prefere empreza sira atu loke investimentu iha área bankária hanesan BNU, fábrika sepatu, roupa, ai-moruk no harii infraestrutra armajen hodi rai ai-moruk hodi fahe ba nasaun sira iha ASEAN no seluk tan.
Xefe Estadu esplika mós pozisaun Timor-Leste atu sai menbru ASEAN, hodi fó oportunidade bo’ot ba merkadu, tanba ne’e produtu husi Portugál nian reprezenta nasaun europeia tomak bele tama ba merkadu ASEAN liu hosi Timor-Leste.
Tuir Xefe Estadu, iha loron 26 setembru vizita ba Nova Iorke hodi koordena ho reprezentante Lideransa Fundasaun Open Society Foundation, George Soros nia ekipa ne’ebé antes ne’e ba ona Dili, hodi halo estudu ida kona-ba ekonomia Timor-Leste ne’ebé sei lansa polítika modernizasaun ekonomia Timor-Leste iha tinan 2023.
“Ha’u ko’alia ona ona George Soros haruka ona ekipa ida ba Timor-Leste hodi halo estudu ba ami-nia ekonomia ne’ebé ami sei lansa dokumentu ida hanesan dalan ida ba modernizasaun Timor-Leste nia ekonomia iha tinan 2023,” PR Horta hateten.
Programa modernizasaun ekonomia sei la’o tuir Planu Estratéjiku Dezenvolvimentu Nasionál (PEDN) 2011-2030 ne’ebé antes ne’e Governu anteriór kria no sensibiliza ona ba povu tomak, maibé tuir Horta katak planu hirak ne’e sei haree fila-fali.
Prezidente Konfederasaun Emprezaria Português apresia tanba bele rona direita esplikasaun Xefe Estadu hodi fó garante ba setór privadu Portugeza atu bele serbisu hamutuk no loke investimentu iha Timor.
Setor privadu Portugál sira husu atu instituisaun ekonomika sira iha Timor-Leste, presiza serbisu makaas hodi kria regra hodi fó garante ba sira.
Parte seluk, Vise Prezidente Kámara Komérsiu Indústria Timor-Leste (CCI-TL-sígla portugués), Fernando da Silva, agradese ba esforsu Prezidente Repúblika nian tanba bele envolve sira koopera ho setor privadu Portugál hodi ba loke investimentu iha Timor-Leste.
“Ita prontu atu serbisu hamutuk ho setór privadu Portugál nune’e kria kampu servisu ba ita-nia Timoroan sira, no Governu tenke asegura estabilidade polítika no kria seguru de vida, hodi fo garante ba ema loke investimentu,” nia hateten.
Fernando sujere importante liu ba Timor-Leste mak Governu presiza kria didi’ak lei investimentu no lei ba rai fó garante ba setór privadu estranjeiru loke investimentu no kria kampu serbisu ba Timoroan sira.
Governu tenke regula investimentu sira ba Timor-Leste, mak tenke ba ho kapital boot tanba daudaun ne’e Governu fó livre ba ema faan sasán nesesidade bázika, tunu sate mai hosi estranjeiru maibé Timoroan sai abandonadu iha nia rain rasik.
Ekontru Xefe Estadu Ramos Horta ne’e akompaña direta hosi Vise Prezidente CCI-TL Asuntu Transporte no Telekomunikasaun, Fernando da Silva, Emprezáriu Sancão Gomes, na’in ba Empreza Esperansa Timor Oan (ETO), Nilton Gusmão no grupu emprezáriu feto Timor.
Governu nia reprezentante mak hosi Ministra Negósiu Estranjeru no Kooperasaun (MNEK), Adaljiza Magno, Embaixadora Timor-Leste ba Portugál, Isabel Amaral Guterres, Embaixadora Portugál ba Timor-Leste, Maria Manuela Bairos.
Entretantu, hafoin simu tomada pose iha loron 20 maiu 2022, Xefe Estadu hala’o vizita Estadu ba nasaun sira hanesan Indonézia, Austrália, Amérika, Kambodia no Portugál hodi konvida emprezáriu bele loke investimentu oioin iha Timor-Leste.
Jornalista : Nelson de Sousa
Editór : Cancio Ximenes
