HNGV selebra loron mundiál Radiolojia
DILI, 05 novembru 2022 (TATOLI)–Hospitál Nasionál Guido Valadares (HNGV) liuhosi Departamentu Radiolojia selebra loron mundiál radiolojia ba dala 127, hodi halo screning ba pasiente sira atu deteta sedu moras ne’ebé mak iha.
Diretór Ezekutivu Hospitál Nasionál Guido Valadares HNGV, Alito Soares hateten departamentu Radiolojia selebra loron mundiál radiolojia ba dala 127 mundialmente, maibé ba Hospitál Nasionál Guido Valadares ka departamentu radiolojia sira foin selebra dala tolu.
“Objetivu ba selebrasaun ida-ne’e sira hakarak selebra sira-nia aniversáriu loron mundiál radiolojia nian, nomós sira-nia asosiasaun radiolojia, halo selebrasaun ida-ne’e koordena ho departamentu relevante sira bele halo screning ka check up liuliu iha X-ray nian hodi halo ultrasonografia ba órgaun ka abodominál,”Diretór Esekutivu Hospitál Nasionál Guido Valadares HNGV Alito Soares informa ba jornalista sira iha HNGV ohin.
Atividade medikal check cup ka atividade hasai X- ray ne’e hakarak halo detetasaun sedu ba moras sira-ne’ebè mak dala barak pasiente sira mai ho kondisaun grave tiha ona mak foin mai halo atendimentu.
Nia akresnta, atividade ida ne’e hanesan kontinuasaun husi atividade screning sira ne’ebé mak dala barak, espesialiazada sira lori besik liu ba komunidade.
”Tinan oin hakarak lori fila fali espesiazada sira besik liu ba komunidade, atubele halo detetasaun sedu no halo tratamentu sedu ba ita-nia maluk sira, no espesialmente ba pasiente sira-ne’ebè mak dala barak mai halo diagnosa tarde,” nia haktuir.
Iha fatin hanesan, Xefe Departamentu Radiolojia, Alberto dos Santos afirma, selebrasaun loron mundiál radiolojia nian presiza halo screning ba ema hotu.
“Ami halao atividade screning ba loron rua ohin no aban, halo screening ne’e iha tipu rua ida mak hasai X-ray ba hirus matan nian ita bele haree saida mak iha pulmaun, ema balun isin di’ak hela maibé presiza halo screening, depois tuir mai halo USG,” Alberto dos Santos esplika.
Nia dehan, dala barak ema hanoin moras mak mai halo screening maibé normalmente iha fulan neen tenke mai halo screening para halo detetasaun katak iha moras duni ka lae.
Jornalista : Felicidade Ximenes
Editór: Evaristo Soares Martins
