iklan

EKONOMIA, BOBONARO, MUNISÍPIU

Prezidente OPTT inaugura “celeiro da resistênsia” CPD-RDTL iha Tapo

Prezidente OPTT inaugura “celeiro da resistênsia” CPD-RDTL iha Tapo

Prezidente OPTT, Ivo de Jesus Sequeira,la’o vizita “Celeiro Resistênsia” CPD-RDTL iha área Oepho,suku Tapo-Bobonaro.Imajen Tatoli/Sergio da Cruz

BOBONARO,05 novembru 2022 (TATOLI)— Prezidente Organizasaun Popular Traballador Timor (OPTT), Ivo de Jesus Sequeira, sábadu (05/11) ne’e,  ofisialmente inaugura “Celeiro Rezistência” ka armazém Organizasaun Konsellu Popular Defeza-Repúblika Demokrátika Timor-Leste (CPD-RDTL) iha área Oepho, suku Tapo, postu administrativu Bobonaro,munisípiu Bobonaro.

Biban ne’e, Prezidente OPTT, Ivo de Jesus Sequeira, hateten celeiro rezistênsia ne’e hanesan fatin ida uluk FATILINTIL sira hanesan Komandante ‘Mau Sesenta’ no gerileiru sira seluk uza hodi halo rezistensia kontra invazor Indonézia hodi luta ba independénsia.

Notisia relevante:PM Taur Husu CPD-RDTL Kumpri Regra no Lei

Tanba ne’e, Membru CPD-RDTL sira organiza malu no tau hamutuk osan ne’ebé rezultadu mai hosi kooperativa ne’ebé establese ona hodi aluga ekipamentu pezasadu ateru-rai, servisu voluntáriu konstrui uma atubele kontinua hatutan istória funu rezisténsia hosi jerasaun ba jerasaun.

“Sede ida ne’e ami establese atubele organiza povu sira hodi elabora dukumentu sira no antisipa situasaun ruma, nune’e ita presiza halibur malu tamba fatin ne’e importante tebes atu hatutan ba ita nia joven sira atu loron ruma labele konfuzaun ba ita nia istória”, hateten Prezidente OPTT ba Jornalista sira.

Alende ne’e, nia dehan estabelese sede Celeiro Resistência iha ne’e tanba ai-fatin ida atu konserva ba rezultadu koperativa hanesan, koto, batar no ai-han ne’ebé membru CPD-RDTL iha suku Tapo kolleta kada tinan.

Tanba Prezidente OPPT afirma objetivu hosi harii kooperativa atu kombate fome kualitativa no kuantativa, nune’e Estadu liuhosi governu labele dependénsia liubá demanda produtu importadu hosi rai-liur tanba ai-han hirak ne’e kontaminadu ho ai-moruk kímiku ne’ebé bele afeta ba ema nia saúde.

“Ita presiza halo natar ho to’os hanesan rezultadu orijen hosi rai la konserva ho kímiku,  hahan ne’e moos  atubele asegura ita nia Estadu. Nune’e ami halo kooperativa ida ne’e hanesan motivasaun ba ita nia povu rihun ba rihun iha sidade Dili atubele fila mai halo sira nia to’os ho natar hodi bele moris diak”, nia haklaken

Kooprativa ne’ebé organizasaun ne’e halo hanesan dalan di’ak ida atu motiva Estadu no governu hodi bele origaniza povu sira halo to’os, natar no hakiak animal, nune’e hakbi’it rendimentu ekonimia nasaun no fámilia hodi labele dependénsia liu ba osan fundu petrolíferu ne’ebé tempu ruma sei maran.

Tanba liuhosi atividade kooperativa sira ne’e bele korre dependénsia ekonómia ba rai-liur, atu kontribui hametin ekonomia rai-laran hodi bele hasaa’e seguransa alimentár ba povu iha Timor laran tomak.

“Depende ba importasaun hosi rai-liur, maibé kuandu funu ruma ka krize ekonomia mosu iha rai-liur ne’e hahan la tama, bele lori problema ba ita nia Estadu. Ita haree kunadu funu bo’ot mosu de’it iha nasaun viziñu sira ne’e ai-han la hatama loron ida ka rua bele lori problema ba povu”.

Iha sorin seluk, Xefe suku Tapo, Xavier Barreto Cardoso, konsidera atividade kooperativa ne’e hanesan meiu ida atu dezenvolve setór agrikultura hodi kria kampu traballu ba joven sira iha suku ne’ebé dezenpregu hela.

“Programa sira ne’e hanesan atu halo intervensaun direta tanba importa sasan sira hosi rai-liur ne’e halo ita des-kontente, ne’e duni programa ne’e hanesan meiu ida atu fanun ita nia Estadu atu investe iha setór agrikultura”, katak Xefe Suku ne’e.

Autoridade lokál ne’e mos oberva katak durante ne’e kooperativa hosi membru CPD-RDTL hetan atensaun hodi governu tanba rezultadu produsaun hanesan koto,batar no ai-han sira seluk ne’e maioria mai hosi produtu lokál Timor nia duni.

Tanba ne’e, autoridade lokál ne’e mós kontinua dezafia ba grupu kooperativa CPD-RDTL Tapo atu kontinua halo servisu atubele dezenvolve no mellra di’ak liután produsaun ne’ebé kuda iha rai potensiál sira ne’e.

“Ita nia produsaun no ita nia rendimentu ne’ebé iha maki ta kontribui ona ba dezenvolve ona ita nia suku partikularmente no jeralmenete ba ita nia nasaun”.

Partisipa iha serimónia inaugurasaun ne’e kompostu hosi reprezentante Komandante Eskudra Polisia Nasionál Timor-Leste (PNTL) postu administrativu Bobonaro, autoridade lokál, membru CPD-RDTL hosi munisípiu Ermera, Baucau,Viqueuque no seluk tan.

Notisia Relevante:Estadu Mak Administra Rai no Eis Sede CPD-RDTL

Jornalista: Sérgio da Cruz

Editór        : Florencio Miranda Ximenes

iklan
iklan

Leave a Reply

iklan
error: Content is protected !!