VIQUEQUE, 06 novenbru 2022 (TATOLI)- Klibur Estudante Progresivu (KEP) – Movimentu Rezisténsia Sosiál (MRS) postu administrativu Uatulari, munisípiu Viqueque, husu meza prezidénsia Parlamentu Nasionál kansela planu sosa karreta ba deputadu sira tanba gasta osan boot tebes.
Portavós KEP-MRS, Nelson da Cruz hateten, Timor Leste hanesan Estadu Direitu demokrátiku ne’ebé hetan rekoñesimentu hosi mundu internasionál iha loron 20 fulan maiu tinan 2002. Liu jornada moruk ne’ebé povu Maubere hetan torturasaun, intimidasaun, esplorasaun no esploitasaun.
Maibé povu maubere nafatin komitmentu hodi sakrifika aan ho konsisténsia ba prinsípiu liberta pátria no liberta Povu, maibé nufin depois Timor hetan independénsia prinsípiu liberta Povu nulu no ema minoria ne’ebé hetan konfiansa husi povu ba ukun nafatin aproveita hodi goja rikusoin povu maubere nian, iha ema maioria nia sofrimentu leten.
“Ho nune’e relasiona polítikaa sosa karreta foun ba deputadu sira iha Parlamentu Nasionál hanesan traisaun boot ida ba povu Maubere, iha era independénsia ida-ne’e. Tanba ne’e, ami KEP-MRS postu Uatulari hamutuk ho povu agrikultór, negosiante, ki’ak urbana hodi reafirma pozisaun katak ami rejeita totál polítika deputadu ne’ebé nakonu interese pesoál,” Portavoz KEP-MRS, Nelson da Cruz informa liuhosi konferénsia imprensa, ih Uatulari, sábadu ne’e.
Portavos ne’e hatutan, orsamentu ne’ebé atu aloka ba sosa karreta foun KEP-MRS hanoin katak bele rezolve problema seluk hanesan estrada, eletrisidade, bee-moos, irrigasaun no setór sira seluk. Maibé orsamentu montante boot lejizladór halo lei ba sira-nia an hodi goja mesak.
“Tanba ne’e ami ezije hakarak husu ba deputadu sira iha Parlamentu Nasionál atu kansela sosa karreta 31 ho laptop 65 tanba gastu osan povu nian ho montante boot tebes. Ami KEP-MRS postu Uatulari husu Prezidente Repúblika, Jose Manuel Ramos Horta hodi tetu Didi’ak OJE 2023 antes promulga,” nia sujere.
Nia husu povu Viqueque tomak matan moris neon na’in ba partidu sira-ne’ebé mak ba kaer ukun nakonu ho interese elite no partidu.
“Ami postu Uatulari sei la hili tán partidu sira-ne’ebé mak asentu iha Parlamentu Nasional tantu parlamentar no opozisaun, karik polítika sosa karreta la kansela. Nune’e mós ami KEP-MRS postu Uatulari sei tún sidade hodi hamutuk ho KEP-MRS nasionál hodi halo manifestasaun ne’ebé sei realiza iha tempu badak nia laran ne’ebé organiza hosi Aliansa Maubere Nasional”.nia realsa.
Jornalista :Vitorino Lopes da Costa
Editór : Evaristo Soares Martins