iklan

NASIONÁL, DILI, HEADLINE, POLÍTIKA

PR Horta halo vizita Estadu bá Portugál hodi hametin kooperasaun bilaterál

PR Horta halo vizita Estadu bá Portugál hodi hametin kooperasaun bilaterál

Prezidente Repúblika, José Ramos Horta. Imajen Tatoli/Francisco Sony

DILI, 06 novembru 2022 (TATOLI)—Prezidente Repúblika, José Ramos Horta, ho nia delegasaun, domingu ne’e, fila hikas mai Timor-Leste hafoin halo vizita Estadu ba Portugál iha loron 29 outubru to’o 04 novembru.

Delegasaun to’o iha aeroportu internasionál Prezidente Nicolau Lobato, Comoro, iha tuku 13:00 ho aviaun Srywijaya Air, ne’ebé simu direitamentu hosi Primeiru Ministru, Taur Matan Ruak no membru Governu sira.

“Ita hotu hatene vizita Estadu ba Portugál nu’udar hametin liután relasaun ne’ebé di’ak ona istorikamente ho Portugál, relasaun bilaterál ho partidu polítiku sira hotu, Governu, Prezidente Repúblika, Parlamentu Nasionál no sira-nia sosiedade sivíl, nune’e povu portugueza kontinua nafatin sempre hadomi Timor-Leste buat hotu ne’ebé akontese,” Ramos Horta, hateten, iha Aaeroportu Comoro.

Vizita refere, nia haree mós situasaun iha Portugál sai kazu boot ida mak joven timor-oan lubuk ne’ebé ba iha Portugál sai vítima ba fatin, serbisu tanba ema ne’ebé bosok sira.

Solusaun ne’ebé parte rua Timor-Leste ho Portugál foti mak sira fó apoiu ona fatin ba joven sira no hetan oportunidade ona oportunidade hahú serbisu.

“Situasaun sira-ne’e Prezidente Portugál ho ha’u rasik mós ba vizita ona ita-nia joven sira ne’e, daudaun sira hamahan aan provizóriu iha Pavilliaun Polísia Munisipál Lisboa, no balu hahú serbisu daudaun ona,” nia dehan.

Nia dehan, hosi vizita ne’e ko’alia ho joven sira, maioria sira hakarak ba Inglaterra, Irlandia no balu hakarak hela iha iha Portugál atu estuda mekákinu karreta, motorizada no tékniku informátiku nian, ida ne’e di’ak tebes ba sira.

Maibé husu ba timor-oan sira favór hein lai lalika fiar ajénsia sira ba Europa ne’ebá, hakarak ba karik hein hafoin iha programa ida normal ofisiál iha kontestu kuadru Komunidade Lian Portugés (CPLP, sigla portugés) nian bolu mobilidade signifika elementu sira CPLP nian bele sirkula tuir kritéria no kondisaun.

“Hein ita-nia Governu ho Portugál hetan enkuadramentu legál prátiku mak joven imi bele ba li’ur. Ha’u-nia mensajen ba joven sira mak labele tuir ajénsia sira-ne’ebé imi nunka koñese, tanba barak mak bosok ema, sé mak buka oportunidade ba serbisu iha rai-liur idak-idak nia direitu maibé tenke haree situasaun, di’ak liu tuir dalan legál hanesan ba Korea Súl no Austrália tanba programa rua ne’e mak ofisiál nune’e labele sai vítima,” Xefe Estadu ne’e dehan.

Jornalista : Arminda Fonseca

Editór: Evaristo Soares Martins

iklan
iklan

Leave a Reply

iklan
error: Content is protected !!