iklan

NASIONÁL, EKONOMIA, DILI, HEADLINE, POLÍTIKA

Prezidente Repúblika husu Governu altera lei ba subsídiu $200

Prezidente Repúblika husu Governu altera lei ba subsídiu $200

Prezidente Repúblika, José Ramos Horta. Imajen Tatoli/Francisco Sony

DILI, 06 novembru 2022 (TATOLI)—Prezidente Repúblika (PR), José Manuel Ramos Horta, husu Governu altera lei kona-bá subsídiu $200 nune’e fó ba ema-ne’ebé merese atu hetan, iha fulan-dezembru funsionáriu hotu sei hetan saláriu désimu terseiru.

“Loos, planu Governu nian sei halo lansamentu ba subsidiu $200 ba uma-kain ne’e sei lansa iha loron 16 novembru, maibé antes to’o loron 16 novembru iha ona solusaun ba subsídiu ne’e rasik, no ha’u sei foti desizaun iha 16 novembru, tanba ha’u mós lakohi atraza ba Orsamentu Jerál Estadu (OJE) 2023, tanba bainhira atraza buat barak mós sei atraza hotu,” Ramos Horta, hateten, iha aeroportu Comoro, Dili, domingu ne’e.

Nia dehan, programa Governu nian ba subsídiu $200 ne’e, nia parte prefere fó lba ema vulnerálvel tanba to’o dezembru funsionáriu sira simu saláriu désimu terseiru.

“Prosesu ne’e halo ha’u triste tanba ema barak kontra ha’u rasik mós, ha’u hakarak subsídiu ida-ne’e la’o-tuir lei anteriór, ema ne’ebé hetan ne’e vulnerável duni, la’ós ba ema hotu-hotu, tanba ita hotu hatene funsionáriu 4.000 resin iha Timór ne’e, dezembru sira sei sei hetan sira-nia direitu saláriu désimu terseiru ” nia dehan.

Xefe Estadu ne’e komprende Primeiru Ministru nia-laran luak, maibé di’ak liu muda tiha lei ne’e.

“Ha’u lakohi veta, ha’u la’ós Prezidente veta nian, entaun sei buka dalan ida atu lalika veta mak Governu rasik mak muda, ida-ne’e mak dalan di’akliu. Husu ba Ministériu Solidaridade Sosiál no Inkluzaun (MSSI) tenke halo esforsu boot liu nune’e subsídiu ne’e atu fó ba sé,” nia dehan.

Jornalista : Arminda Fonseca

Editór : Evaristo Soares Martins

iklan
iklan

Leave a Reply

iklan
error: Content is protected !!