iklan

HEADLINE, MUNISÍPIU, POLÍTIKA

PA Bobonaro sei hatún despaxu ba funsionáriu ida lidera provizóriu Balibo

PA Bobonaro sei hatún despaxu ba funsionáriu ida lidera provizóriu Balibo

Prezidente Autoridade Munisípiu Bobonaro, Ernesto de Oliveira Barreto. Imajen Tatoli/Sérgio da Cruz.

BOBONARO, 07 novembru 2022 (TATOLI) – Prezidente Autoridade Munisípiu Bobonaro, Ernesto de Oliveira Barreto, sei hatún despaxu ba funsionáriu ida nível IV hodi lidera provizóriu postu administrativu Balibo tanba administradór atuál hakotu ona peregrinasaun hosi mundu.

Prezidente Autoridade Munisípiu Bobonaro, Ernesto de Oliveira Barreto, fó-sai katak, despaxu ne’ebé iha sei orienta atuál xefe seksaun finansa administrasaun postu Administrativu Balibo, Bruno Rebeiro, asume kargu administrador postu administrativu Balibo ho provizóriu.

Ernesto haktuir, tuir loloos substituisaun temporária ne’e hala’o tiha ona hafoin haloot matebian Procopio Caero maibé tanba selebrasaun loron finadu nune’e iha loron 07 novembru ne’e mak foin prepara despaxu.

“Serteza ké subtituisaun tenke iha hodi hein desizaun hosi Governu Sentrál, agora ida-ne’ebé atu asume kargu temporária mak señor Bruno, tanba funsionáriu nível III ka II labele, Bruno mak nível IV, entaun provizóriu nia mak asume kargu hanesan administradór postu Balibo provizoriamente,” nia informa ba jornalista sira, iha Maliana, segunda ne’e.

Prezidente Autoridade Munisípiu Bobanaro ko’alia ona ho atuál xefe seksaun finansa ne’e maibé funsionáriu ne’e terseira simu responsabilidade ne’e tanba nia parte sente todan oituan.

“Ha’u obrigatóriu tenke fó despaxu ida ba nia, atu nune’e serbisu iha postu Balibo bele la’o, tanba orsamentu PMOPA, orsamentu Sekretaria Estadu Juventude no Desportu ba preparasaun 28 novembru agora, sé laiha administradór provizóriu ida-ne’e susar atu ezekuta osan sira-ne’e,” nia katak.

Entretantu, matebian Procopio Caerro simu pose simu hosi Ministériu Administrasaun Estatál (MAE) iha loron 28 fevereiru 2022 hodi asume kna’ar nudar administradór postu administrarivu Balibo ba mandatu períodu ida.

Depois iha loron 01 marsu 2022, hahu hala’o kna’ar nu’udar administrador postu administrativu Balibo to’o hakotu nia vida iha loron 25 fulan-outubru tinan 2022 maibé seidauk hetan saláriu ba kna’ar ne’ebé nia asume.

Relasiona ho kestaun ne’e, Prezidente Autoridade Munisípiu Bobonaro dehan, seidauk bele halo transferénsia orsamentu tanba durante sai administradór postu matebian seidauk hetan karta aseitasaun hosi Ministériu Turizmu, Komérsiu no Indústria (MTKI).

“Foin daudaun rekursu umanu tún ba Dili lori ona karta aseitasaun seidauk to’o mai, nia mate ona, ne’ebé osan kargu xefia nian ne’e, nia sei simu retroativu fulan sia nian, depois hein ba oin fulan-tolu tán mak foin para, agora prosesa hela,” nia informa.

Biografia badak

Procopio Caeiro, moris iha bee-ain, iha loron 17 dezembru 1962, hahú serbisu iha hosi tinan 1985-1999, nu’udar PNS iha Dolog, Baucau.

Iha tinan 2007, até 28 fevereiru 2022 serbisu nu’udar funsionáriu públiku iha Ministériu Turizmu, Komérsiu no Indústria (MTKI). Hafoin ida-ne’e iha loron 28 fevereiro 2022, simu pose nu’udar administradór postu Balibo no iha loron 1 marsu 2022 no hahu hala’o kna’ar to’o loron 27 outubro 2022, tuku 15.00 hakotu iis iha Hospital Nacional Guido Valdares, Dili tanba moras.

Matebian husik hela feen kaben Angela Maria da Silva no oan-kiak na’in-sia kompostu hosi mane na’in-neen no feto na’in-tolu.

Postu administrativu Balibo iha aldeia 27, suku neen ho totál populasaun 19,869 komposta hosi feto 9.833, mane 10,036 ho totál xefe família 4.708.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!